Qazaqstandyq jeńil atlet Olga Rypakova kásibi sportpen qoshtasatyny týraly málimdedi, dep habarlaidy "Ult aqparat".
«Men baqyttymyn, sporttaǵy mansabym Olga Saladýhina jáne Katia Mena sekildi keremet sportshy qyzdardyń sektorda óner kórsetýimen týra keldi. Tokio Olimpiadasy men úshin de, olar úshin de sporttaǵy mansabymnyń qorytyndysy boldy. Olar men úshin úzdik úshtik bolyp qala beredi. Endigi ýaqytta men olardy qarsylas retinde emes jaqyn qurbym retinde qurmettep, jaqsy kóremin. Aldaǵy ýaqytta sektordan tys talai kezdesemiz dep oilaimyn. Olarǵa tabys tilep, alǵa qoiǵan arman-maqsattarynyń oryndalýyna tilekshimin. Ómirleri tabysqa toly bolsyn!. Eshqashan jasymasyn!», - dep jazdy O. Rypakova Instagram paraqshasynda.
Aita keteiik, Tokio Olimpiadasynda úsh qarǵyp sekirýde qazaqstandyq Olga Rypakova finalǵa óte almady.
Sportshy buǵan deiingi úsh Olimpiadada da júldegerler qatarynan kórindi. 2008 jyly kúmis, 2012 jyly altyn, 2016 jyly qola júldeger atandy.
