London - 2012 Olimpiadasynyń chempiony, Beijiń-2008 jáne Rio-2016 Olimpiada oiyndarynyń júldegeri Olga Rypakova aldaǵy josparlary týraly suraqtarǵa jaýap berdi, dep habarlaidy QazAqparat.
«Eger sizge jeńil atletika federatsiiasyna basshylyq laýazym usynylsa, sol jerge barasyz ba nemese ózińizge jáne otbasyńyzǵa kóbirek kóńil bólesiz be?» - dep surady tilshiler.
Jeńil atlet ózi úshin árdaiym otbasy birinshi orynda ekenin aitty.
«Olar meni sportta da qoldaǵan edi. Árine, bul óte qiyn. Kóptegen adamdar sport úshin qandai qurbandyqtar jasaisyz dep suraidy. Bul meniń otbasym, balalarym. Árine, jaqyn arada balalaryma jáne otbasyma kóbirek kóńil bólgim keledi. Otbasy birinshi orynda, qalǵanyn kóre jatarmyz», - dedi Rypakova Ortalyq kommýknikatsiialar qyzmetinde.
Ol sportpen bailanysty barlyq máselelerdi ákesimen talqylaitynyn atap ótti.
«Ákem – bala kezimnen meniń jattyqtyrýshym. Meni jáne sportty bailanystyratyn barlyq máseleler, bolashaqqa josparlar birlesip talqylanady. Aldaǵy jospardy áli talqylamadyq. Erteń de emes, múmkin kelesi aptada aldaǵy josparlardy, bolashaq ómirdi talqylaityn shyǵarmyz. Meniń oiymsha, bul tez sheshilýi tiis másele emes. Barlyǵyn, qalai ómir súrý kerek, kelesi jarystarǵa jattyǵý kerek pe, Aziia oiyndaryna daiyndalý kerek pe – naqtylaityn ýaqyt bar. Aziia oiyndaryna deiin sportta qalý týraly da usynystar boldy», - deidi Rypakova.
