Jeńil atletikadan Qazaqstan komandasynyń úzdigi, úsh qarǵyp sekirýden Olimpiada chempiony Olga Rypakova «Gaýhar ligasyna» qatysýdan bas tartty. Bul týraly ol Instagram-daǵy paraqshasynda jazdy, dep habarlaidy "Ult aqparat".
Ol Álem chempionatyna daiyndyqty barynsha kúsheitý úshin osyndai qadamǵa barǵan.
«Sizderdiń pikirlerińizdi oqyǵan saiyn, sportshyǵa jankúierdiń qoldaýy qanshalyqty mańyzdy ekenin túsinemin. Parijde sátsiz óner kórsettim - 14,16 metr. «Gaýhar ligasynyń» finaldyq kezeńine ótsem de, finalǵa qatysýdan bas tarttym. Sebebi Álem chempionatyna daiyndyqqa kóbirek kóńil bólgim keledi. Parijdegi kórsetkishke keler bolsam... Sportshylar meni túsinedi: udaiy jańa biikti baǵyndyrǵyń keledi. Tipti, bul óz densaýlyǵyńa ziian bolsa da. Belokýrihada em alǵan soń, birden Parijdegi jarysqa kettim. Áli tolyq emdelip úlgermegenim sekirý barysynda baiqaldy. Dese de, munyń úlken tájiribe bolǵanyn moiyndaimyn. Barlyqtaryńyzǵa jyly sózderińiz ben qoldaýlaryńyz úshin alǵys aitamyn. Alda Álem chempionaty men Tokiodaǵy Olimpiada oiyndary kele jatyr. Sol syndarda biz mindetti túrde jaqsy nátije kórsetemiz. Bastysy – eńseni biik ustap, daiyndyqty jalǵastyrý», - dep jazdy Rypakova.
Sportshy Parijdegi áigili «Gaýhar ligasy» týrniriniń finalyna ótkenin buǵan deiin jazǵan bolatynbyz.
