Olimpiada chempiony Olga Rypakova keniialyq jeńil atletterdiń ulttyq quramaǵa qabyldanýy týraly oiymen bólisti, dep habarlaidy olympic.kz.
Tanymal sportshy óz pikirin áleýmettik jelide jariialaǵan.
Rypakova óz sózinde sheteldik sportshylardyń otandyq jeńil atletikanyń damýyna úles qosatynyn atap ótken.
Aita ketelik, Nora Djerýto, Karolin Kipkirýi, Deizi Djepkimei, Shedraka Koecha syndy sportshylar bapkeri ári menedjeri Kennet Rotichpen birge 2018 jyly Qazaqstan tólqujatyn alǵan edi.
«2018 jyldyń jeltoqsanynda keniialyq tórt sportshy men olardyń bapkeri Qazaqstan azamattyǵyn qabyldady. 2019 jyldyń qańtarynan bastap atalǵan sportshylar Shyǵys Qazaqstan oblysynyń quramasy men «Altai Atletiks» klýbynyń namysyn qorǵaidy.
Elimizdegi jeńil atletikanyń damýyna bei-jai qaramaityndyqtan, keniialyq sportshylardyń kelýi oń áser beretinin aitqym keledi.
Bul álemde bar tájiribe. Qazaqstan úshin de tańsyq emes. Elimizge 2005 jyldan beri sheteldik sportshylar shaqyrylýda.
Qazaqstan týynyń astynda óner kórsetetin Keniia sportshylary álemdik jarystarda júldege iligip júr. Osylaisha, biz álemdik jeńil atletikada aitarlyqtai imidj qalyptastyramyz.
Keniialyq jelaiaqtar óz tájiribeleri men tehnikasyn bizdiń sportshylarǵa úiretip, jastarǵa jol kórsetinine, sheberlik sabaqtaryn ótkizerine senimim mol. Odan bólek, sportshylar ishki birinshiliktegi básekelestikti arttyra túsedi.
Sportshylar óz erikterimen QR azamattyǵyn qabyldady. Jaqsy nátije kórsetýge talpynǵan adam retinde mundai áriptesterim baryna qýanamyn», - deidi Rypakova.
