Olimpiada chempiony Olga Rypakova úsh qarǵyp sekirýde Aziianyń eń úzdik sportshysy ekendigin taǵy da dáleldedi. Ol búgin Djakartada ótip jatqan Aziada oiyndarynda chempion atandy, dep habarlaidy "Ult aqparat".
QR Ulttyq olimpiada komitetiniń málimetinshe, sportshymyz ekinshi márte qarǵyp sekirýinde 14 metrdi baǵyndyrǵan. Al qalǵan qarsylastarynyń birde-biri mundai kórsetkish kórsete alǵan joq. Olga Rypakova úshinshi márte sekirýinde 14,26 metr nátije kórsetti.
Ekinshi oryn 13,93 metrge sekirgen tailandyq Chýmaiaroeng pen dál sondai nátije kórsetken vetnamdyq sportshyǵa buiyrdy.
Qazaqstan atynan jarys jolyna shyqqan taǵy bir sportshymyz Irina Ektova 13,58 metrdi baǵyndyryp, 6 orynǵa turaqtady. Aita keterligi, Olga Rypakova osymen tórtinshi márte Azia oiyndarynyń chempiony atanyp otyr.
Eske sala keteiik, 30 tamyzdaǵy kórsetkish boiynsha Qazaqstan quramasynda 60 medal bar. 11 altyn, 11 kúmis jáne 38 qola. Jalpy komandalyq esepte ázirge 11-shi oryndamyz.
