QR Ishki ister ministri Erlan Turǵymbaev IIM basshysynyń orynbasary general Mahambet Abisatovtyń qyzmetinen ketýine qatysty pikir bildirdi, dep habarlaidy "Ult aqparat".
«Ol qyzmetinen ketýge raport berdi. Biz onyń osy ótinishin qanaǵattandyrýǵa kelistik», - dedi E. Turǵymbaev Úkimet otyrysynan keiin tilshiler saýalyna jaýap bere otyryp.
Sonymen qatar ministr atalǵan qyzmetkerdiń jumystan ketýine ne sebep bolǵanyn túsindirdi.
«Bul máselede memlekettik qyzmetshiniń etikasy buzyldy. Onyń aitqan sózderi resmi emes jazbada jariialandy. Biz oǵan qatysty eshqandai sheshim shyǵarǵan joqpyz», - dedi vedomstvo basshysy.
Eske salsaq, buǵan deiin M. Abisatovtyń sózi jazylǵan aýdiofaildar jelide taraǵan bolatyn. Bul taspada general qyzmetkerlerdiń jumysyn synap, balaǵat sózderdi aitqanyn baiqaýǵa bolady.
Aita keteiik, Mahambet Haiyrjanuly Abisatov Qazaqstan Respýblikasy Ishki ister ministriniń orynbasary qyzmetine biyl sáýirde taǵaiyndalǵan bolatyn.
