Foto: cnews.ru
Jańa oqý jyly bastalǵaly beri alaiaqtar balalarǵa qońyraý shalyp, ózin muǵalimmin dep tanystyryp júr, dep habarlaiy QR Oqý-aǵartý ministrligi Balalardyń quqyqtaryn qorǵaý komitetinen.
Komitettiń habarlaýynsha, «Elektrondyq kúndelikti jańartý» degen syltaýmen olar SMS arqyly kelgen bir rettik qupiia kodtardy suraidy. Bala ony ata-anasyna nemese mektebine kómektesip jatyrmyn dep oilaýy múmkin. Is júzinde alaiaqtar osy kodtardy paidalanyp, «Elektrondyq úkimet» júiesine, onlain-bankingke nemese týystarynyń bank shottaryna qol jetkizedi.
Osy rette ministrlik SMS-tegi kodtardyń jeke málimet ekenin jáne olardy ata-anadan basqa eshkimge aitýǵa bolmaitynyn eskertti.
Balamen áńgimeleskende erekshe mán beretin jaittar:
qandai jaǵdaida da SMS arqyly kelgen kodtardy eshkimge bermeý;
qońyraý shalǵan adam ózin muǵalim nemese mektep qyzmetkerimin dese de, birden ata-anasyna habarlasý;
kúdikti siltemelerge ótpeý, beitanys qosymshalardy júktemeý.
Ata-analar ne istei alady:
balaǵa shynaiy muǵalimder men mektep qyzmetkerleri eshqashan SMS kodtaryn nemese bank kartasynyń derekterin suramaitynyn túsindirý;
telefonǵa ata-ana baqylaýyn ornatyp, beimálim nómirlerden keletin qońyraýlardy qadaǵalaý;
balańyzben senimdi qarym-qatynas ornatyp, osy syndy jaǵdaidy jasyrmai aitýǵa bolatynyn sezdirý.
Kúdikti áreketter baiqalǵan jaǵdaida quqyq qorǵaý organdaryna nemese 111 Bailanys ortalyǵyna habarlasýǵa bolady. Balalaryńyzdy qorǵańyzdar — olardyń qaýipsizdigi sizdiń qyraǵylyǵyńyzdan bastalady!, -delingen QR Oqý-aǵartý ministrligi Balalardyń quqyqtaryn qorǵaý komiteti taratqan habarlamada.
Osyǵan deiin Qarjylyq monitoring agenttigi alaiaqtyqtyń jańa túri týraly eskertken bolatyn.
