Mektep oqýshylarynyń 95,4 paiyzy jańartylǵan mazmunǵa kóshti. Bul týraly Parlament Májilisindegi Úkimet saǵatynda QR Bilim jáne ǵylym ministri Ashat Aimaǵambetov málim etti, dep habarlaidy "Ult aqparat".
«Mektep oqýshylarynyń 95,4 paiyzy jańartylǵan mazmunǵa kóshti. Muǵalimderdiń 94 paiyzy jańa júie boiynsha biliktilikti arttyrýdan ótti. Jekelegen kýrstar aýyldyq jáne shaǵyn jinaqty mektepter úshin qarastyrylǵan», - dedi ministr Bilim berýdi jáne ǵylymdy damytýdyń 2016-2019 jyldardaǵy baǵdarlamanyń iske asyrylýyn talqylaý barysynda.
Vedomstvo málimetine qaraǵanda, 5 kúndik oqý aptasy engizildi. Bilim alýshylardyń oqý jetistikterin baǵalaýdyń kriterialdy júiesi qamtyldy. 273 myń muǵalim (94%) jańartylǵan oqytý baǵdarlamasy boiynsha daiyndyqtan ótti jáne jańartylǵan mazmun boiynsha sabaq bergeni úshin ústemaqy alady.
Qala jáne aýyl mektepteri arasyndaǵy bilim sapasy boiynsha alshaqtyqty qysqartýǵa erekshe nazar aýdarylady. OJSB-2019 nátijesinde qala-aýyl alshaqtyǵy 11-synypta 7,3%-ǵa qysqarǵan (2018 j. – 11,8%).
«PIRLS-2016 zertteýinde (bastaýysh mektep oqýshylarynyń mátindi oqý jáne túsiný sapasy) qazaqstandyq oqýshylardyń ortasha baly 536-ny qurady. Bul Qazaqstanǵa 50 eldiń ishinde 27 oryn alýyna múmkindik berdi. Bul nátijeni Germaniia, Kanada, Avstriia jáne Slovakiia Respýblikasyndaǵy qurdastarynyń kórsetkishterimen sáikes keledi», - delingen ministrlik aqparatynda.
Qazaqstandyq bilim berýdiń negizgi resýrsy joǵary bilikti pedagogikalyq kadrlar bolyp tabylady. 2018 jyly kúndizgi memlekettik jalpy bilim berý mektepteri muǵalimderiniń 54,5 paiyzynyń (157 944 adam) birinshi jáne joǵary sanaty bar. Pedagogikalyq korpýsty jas mamandarmen tolyqtyrý 3,5 paiyzdy qurady.
