Oqýshylar men stýdentter arasyndaǵy tóbelesten soń qalada reid kúsheiip, ata-analar jaýapqa tartylyp jatyr. Aqtóbe qalasynyń ákimi Iliias Ispanov mektepterde arnaiy kúzet qyzmeti jumysqa kirisetinin aitty, dep habarlaidy "Ult aqparat".
Sońǵy kezde Aqtóbede mektep oqýshylary arasyndaǵy qylmys jii tirkele bastady. Aita keteiik, 29 qańtar kúni stýdentter tóbelesip, bireýi pyshaq jaraqatymen aýrýhanaǵa tústi.
Al Shalqar aýdanynda oqýshylar tóbelesip, oqýshy kóz jumdy.
Endi mektepterde arnaiy kúzet qyzmeti jumys istep, oqýshylar tekseriledi. Olardan tyiym salynǵan zattar anyqtalsa, dereý politsiia shaqyrylady.
«Aqtóbe qalasynda, óńirde, Qazaqstannyń birneshe aimaǵynda balalar topqa bólinip, tóbelesti. Qalada kolledj stýdentteri, mektep oqýshylary men stýdentter tóbelesti. Barlyq qylmys egjei-tegjei tekserilip jatyr. Birinshiden, kúdiktiler ustaldy, zań aiasynda qatań shara qoldanylady. Ekinshiden, qazir top bolyp júretin balalar baqylaýǵa alyndy. Tóbeleske beiim balalar mektepten-aq belgili. Mektep inspektorlary, bilim bólimi jumys atqaryp jatyr, jedel top quryldy. Sabaqqa kelmeitin, úlgerimi nashar balalar tizimge alyndy. Mektepishilik, mekteparalyq jáne politsiia departamentinde óz tizimi jasaldy. Ár ata-ana balasy úshin jaýapty. Mektep ishinde muǵalim qaraýy tiis. Búginge deiin mektepterde arnaiy kúzet qyzmeti bolmady. Endi bilim ordalaryn arnaiy litsenziiasy bar kúzet qyzmeti baqylaýǵa alatyn bolady. Sebebi, oqýshylar mektepke tyiym salynǵan zattardy alyp kelýi múmkin. Tekserý bolady, eger tyiym salynǵan zat anyqtalsa, ishki ister organdary shaqyrylady», - dedi qala ákimi Iliias Ispanov.
