Oqýshylar olimpiadasyn ótkizý kezinde óreskel buzýshylyqtar anyqtaldy, dep habarlaidy "Ult aqparat" QR BǴM baspasóz qyzmetine silteme jasap.
Bilim jáne ǵylym ministrliginiń Túrkistan oblysynyń bilim berý salasyndaǵy sapany qamtamasyz etý departamenti jalpy bilim beretin pánder boiynsha oqýshylar arasyndaǵy respýblikalyq olimpiadanyń oblystyq týryn ótkizý barysynda Túrkistan oblysynyń adami áleýetti damytý basqarmasynda jospardan tys tekserý júrgizdi. Respýblikalyq olimpiadanyń oblystyq týry osy jyldyń 5-6 qańtarynda ótken.
«Tekserý nátijeleri boiynsha birqatar óreskel buzýshylyqtar anyqtaldy: oblystyq pándik olimpiadanyń qazylar alqasy tarapynan obektivti emes sheshim shyǵarý faktileri; júldeli oryndardyń ádiletsiz berilýi, atap aitsaq tómen ball jinaǵan qatysýshylar júldeli oryndarǵa ie bolyp, joǵary ball alǵan qatysýshylar – júldeli orynsyz qalǵan.
Oblystyq kezeńniń qorytyndysy boiynsha júldeli oryndarǵa konkýrstyń birinshi týrynan ótpegen qatysýshylar ie bolǵan. Sonymen qatar, uiymdastyrý komitetimen olimpiadany ótkizý erejeleriniń talaptary buzylǵan», delingen habarlamada.
Respýblikalyq olimpiadanyń oblystyq kezeńin uiymdastyrý jáne ótkizýge Túrkistan oblysynyń adami áleýetti damytý basqarmasy, sondai-aq aýdandyq jáne qalalyq bilim bólimderi jaýapty bolǵan.
«Tekserý nátijeleri boiynsha anyqtalǵan buzýshylyqtardy joiý týraly nusqama berildi, sondai-aq Qazaqstan Respýblikasynyń Sybailas jemqorlyqqa qarsy is-qimyl agenttigine hattar jiberildi», delingen habarlamada.
Ministrliktiń habarlaýynsha, BǴM barlyq deńgeidegi konkýrstar men olimpiadalardyń ashyqtyǵyn ári obektivtiligin qamtamasyz etýdi kózdep otyr.
«Olimpiada ótkizý úrdisiniń ashyqtyǵyn barynsha qamtamasyz etý maqsatynda barlyq aqyly olimpiadalar alynyp tastalyp, ministrliktiń normativtik quqyqtyq aktilerine ózgerister engizilýde. Olimpiadalardy tolyqtai tsifrlandyrý boiynsha jumystar júrgizilýde», delingen habarlamada.
