Jambyl oblysy Qordai aýdanynyń 72 jastaǵy turǵyny L. Sýdnik infektsiiany halyq kóp jinalatyn qoǵamdyq orynda juqtyrǵan, dep habarlaidy "Ult aqparat" oblystyq densaýlyq saqtaý basqarmasyna silteme jasap.
Onyń aitýynsha, aýrý aiaq astynan bastalǵan, dene temperatýrasy 39 S deiin kóterilip, qurǵaq jótel paida bolǵandyqtan bastapqyda JRVI dep oilap, 7 kún boiy úiinde antibiotiktermen emdelgen.
Alaida, úide qabyldaǵan em kómektespei, artynsha tynysy tarylyp, alqyna bastaǵandyqtan jedel járdem kóligimen naýqas aýdandyq aýrýhanaǵa jetkiziledi.
«Keýde qýysynyń rentgenografiiasy jáne PTR diagnostikalyq zertteý qorytyndysynda «virýstyq pnevmoniia» diagnozy anyqtaldy. Qordai aýdandyq aýrýhanasynda naýqas bes kún boiy em qabyldaǵan, alaida jaǵdaiy jaqsarmady. Sosyn ony Jambyl oblystyq kópbeiindi balalar aýrýhanasynyń juqpaly aýrýlar qurylymyna aýystyrdy. 5-shi bólimniń meńgerýshisi Tanabaeva A. jáne emdeýshi dáriger Tlekeeva A. naýqastyń ókpesiniń 70% zaqymdanǵanyn anyqtady» dep habarlady basqarmadan.
Patsienttiń eki ókpesi birdei qabynyp, sonyń saldarynan ókpesine aýa jetpei qalǵan. Dárigerler egde jastaǵy áielge onyń aýrýynyń dárejesin túsindirip, emdeý josparymen bólisti.
Aq halattylarǵa senim bildergen ol barlyq taǵaiyndaýlardy qatań saqtady. Nátijesinde 16 kúnniń ishinde qart ana qaýipti indetten qulan-taza aiyqqan.
Aýrýhanadan shyqqan L.Sýdnik meditsina qyzmetkerlerine kásibiligi men iltipaty úshin alǵys aityp, aýrýhana qyzmetkerlerine densaýlyq pen amandyq tiledi.
