Ońtústik Qazaqstan oblystyq máslihatynyń kezekten tys jiyrma úshinshi sessiiasynda depýtattardyń qaraýyna Shymkent qalasy halqynyń bir millionǵa jetýine orai, oǵan erekshe mártebe berý máseleleri usynyldy. Sondai-aq oblys ortalyǵyn Túrkistan qalasyna kóshirý jáne osyǵan bailanysty oblystyń, Túrkistan, Kentaý qalalarynyń shekaralaryna ózgerister engizý jaiy sóz boldy, dep habarlaidy QazAqparat tilshisi.
Sessiiaǵa qatysqan oblys ákimi Janseiit Túimebaev engizilip otyrǵan ózgeristerge sáikes, Túrkistan qalasynyń oblys ortalyǵy bolýy kezinde qala ákimdigine qarasty 12 aýyl okrýgi Kentaý qalasy ákimdiginiń qaramaǵyna ótetinin atap ótti.
«Elbasymyz Nursultan Ábishuly Nazarbaev qashan da ult rýhaniiatynyń altyn uiasy, qazaq tarihynyń túp tamyry - Ońtústikke airyqsha kóńil bólip keledi. Táýelsiz Qazaq elinde tuńǵysh ret milliondyq qalany mejeleý, oǵan arnaiy mártebe berý isi 2014 jyldan bastaldy. Búginde kózdelgen maqsat oryndalyp, Shymkent qalasy turǵyndary 1 millionǵa jetip otyr. Biz sizdermen birge Shymqalaǵa respýblikalyq mártebe berýmen qatar, jańadan oblys ortalyǵyn tańdaý baqyty buiyrǵan tarihi sáttiń tabaldyryǵynda turmyz. Mundai ortalyq retinde Qazaq eli úshin ǵana emes, isi túrki álemine ortaq, qasietti Túrkistannyń tańdalýyn halyqtyń zor yqylaspen qabyldaýyn qýanyshpen atap aitqym keledi. Muny Túrkistan, Kentaý qalalarynyń shekaralaryna ózgerister engizý barysynda turǵyndarmen júrgizilgen qoǵamdyq tyńdaýlar men ózderińizben talqylaý barysynda aiqyn sezinip otyrmyz. Al Shymkent qalasynyń aýmaǵy ózgerissiz qalyp, oblystyń aýmaǵynan jeke bólinip shyǵýyna bailanysty oblystyń aýmaǵy qysqarady», - dedi Janseiit Túimebaev.
Sonymen qatar, áleýmettik, ákimshilik nysandardyń ornalasý jaǵdaiy men infraqurylymmen, onyń ishinde, aýyzsýmen, gazben, avtomobil joldarymen, bailanys jelilerimen qamtylýy, aǵyn sýmen qamtamasyz etilýi, jer jaǵdaiy, olardyń halyqqa yńǵaily bolý máseleleriniń barlyǵy eskerilgenin jetkizdi. Endi atalǵan másele boiynsha Úkimet janynan qurylǵan arnaiy jumysshy toppen birlese bólýdiń ekonomikalyq tiimdiligine, onyń oblystyń, Shymkent, Túrkistan, Kentaý qalalarynyń áleýmettik-ekonomikalyq damýyna áseri jan-jaqty taldandy.
Jalpy, qalanyń injenerlik-infraqurylymmen qamtylý deńgeii joǵary bolyp tabylady. Bul kórsetkishter Shymkent qalasyna erekshe mártebe berýine tolyq múmkindik beredi. Qalaǵa úshinshi megapolis statýsy berilgen jaǵdaida, qala biýdjetiniń kiristeri 72,1 mlrd. teńgege kóbeiip, sýbventsiia 13,4 mlrd. teńge kóleminde boljanýda.
