Ońtústik Qazaqstanda kóleńkeli kásippen ainalysyp júrgen azamattardyń qatary artyp barady. Bul týraly oblystyq kásipkerlik, indýstrialdy-innovatsialyq damý jáne týrizm basqarmasynyń mamandary málimdep otyr. Aitýlarynsha, ózin jumyspen qamtamasyz etken 503 myń jerlesimizdiń 250 myńy óz isin zańdy tirkemegen. Nátijesinde, biýdjetke keltirilgen shyǵyn kólemi orta eseppen 2,5 mlrd. teńgege jetip otyr.
Bul aqparat «Ońtústik Qazaqstan oblysy – klimat úshin ońtaily óńir» jobasyn júzege asyrý barysynda anyqtaldy. Tyń bastama ótken jyly óńirimizdegi kásibin dóńgeletip júrgen jergilikti kásipkerlerdiń kóbeiýi úshin, olardy demep-qýattaý maqsatynda qolǵa alynǵan edi. Iaǵni, OQO ákimdigi men «NurOtan» partiiasynyń qoldaýymen oblystyq prokýratýranyń qyzmetkerleri zańsyz áreketti áshkerelep, tiisti jumysty atqarýǵa kirisken.
Mamandardyń málimentinshe, tirkelmegen kásipkerlerge arnaiy shara kóriledi. Dáliregi, QR Kodeksiniń ákimshilik quqyq buzýshylyq zańnamasynyń 463-baby boiynsha jaýapqa tartylatyn bolady. Al salyqqa tiisti tólemdi jasamai, «únemdegen» kásipkerlerge 15-ten 150 ailyq eseptik kórsetkish (AEK) kóleminde aiyppul salynady. Sondai-aq, kei jaǵdailarda azamattyq zań talaptaryn qunttamaǵany úshin, qarjy nemese ózge de qundy qaǵazdardy tárkileýi múmkin. Eger, atalǵan kólemdegi aiyppuldy ótegen kásipker tirkelmegen zańsyz kásibin dóńgeletýdi jalǵastyrǵan jaǵdaida, tólenetin aiyppuldyń quny eselenedi. Iaǵni, kásipker memleketke 30-dan 500 AEK-ke deiin aiyppul tóleýge mindetteledi.
Oblystyq statistika departamentiniń dáiegine sensek, búginde bir ǵana Ońtústik óńirinde 215 317 shaǵyn jáne orta kásipkerlik sýbektisi tirkelken. Onyń 84% -y belsendi jumys atqaryp keledi. Bul tiisti jasaqtyń 176 684-yn quraidy.
Osyǵan bailanysty, oblystyq basqarmanyń jaýapty mamandary atalǵan aiyppuldardyń aldyn alý úshin óńir kásipkerlerinen óz kásibin resmi tirkep, zań sheńberinde jumys isteýdi suranady.
