Ońtústik Qazaqstan oblysy Qazyǵurt, Saryaǵash jáne Maqtaaral aýdandarynyń 700 myńǵa tarta halyqty sapaly aýyz sýmen qamtamasyz etý máselesi aldaǵy 5 jylda tolyq sheshimin tabady. Jergilikti bilik atalǵan máseleni Ógem ózenin aýyz sý retinde paidalaný arqyly túpkilikti sheshýge bel býyp otyr. Bul týraly OQO ákiminiń baspasóz qyzmeti habarlady.
Osy maqsatta biylǵy jyldyń 15 aqpanynda Qazaqstan men Ózbekstan Úkimeti ókilderiniń ekijaqty yntymaqtastyqty jetildirý máseleleri jónindegi birlesken jumys toby basqosqan bolatyn.
Atalǵan májiliste Ógem ózeninen kólemi sekýndyna 3-3,5 tekshe metrge deiin sýdy buryp atalǵan aýdandardyń turǵyndaryna aýyz sý retinde paidalaný máselesi qaralyp, oń sheshimin tapty. Ol úshin Qazyǵurt aýdanynyń Ógem aýyly tusynan Ógem ózeninen qubyr arqyly sý burý jumystary júrgizilýi tiis.
«Eger qazirgi kelissózder nátijeli aiaqtalsa, joǵaryda atalǵan problemany túpkilikti sheshýge bolady»,- deidi oblystyq energetika jáne turǵyn úi kommýnaldyq sharýashylyǵy basqarmasynyń basshysy Marǵulan Maraiym.
Aita keteiik, Ógem ózeniniń basym bóligi Qazaqstan Respýblikasy aýmaǵynda ornalasyp kórshiles Ózbekstan Respýblikasynda ishinara ornalasqan transshekaralyq ózenge jatady.
Budan bólek, qazir oblysta jer asty sý qoryn anyqtaý jumystary júrgizilip jatyr. Jalpy óńirde sý qoryn anyqtaýdy qajet etetin 383 eldi meken bolsa, búgingi tańǵa sonyń 244-inde izdeý-barlaý jumystary aiaqtalǵan. 2017 jyly 34 eldi mekende, al 2019 jylǵa deiin qalǵan 105-inde tiisti jumystar atqarylady dep kútilýde. Bul baǵytqa 1,6 mlrd. teńge baǵyttalǵan.
Sondai-aq biyl jańadan 10 eldi mekendi ortalyqtandyrylǵan aýyz sýmen qamtý jumystary júrgizilýde. Nátijesinde aýyz sýmen qamtylǵan eldi mekender sany 628-ge jetkiziletin bolady. Bul óńirdegi turǵyndardy qamtý deńgeiin 74,4%-ǵa kóteredi.
Jalpy 2020 jylǵa 702 eldi mekenderge aýyz sý júiesin júrgizip, turǵyndardyń qamtý deńgeiin 83,2% jetkizý josparlanýda. Bul rette aýyz sýdy turǵyndarǵa úzdiksiz 24 saǵat berýge nazar aýdarylatyn bolady.
