Búgin Ońtústik Qazaqstan oblysynyń ákimi Janseiit Túimebaev memleket jáne qoǵam qairatkeri Názir Tórequlovtyń 125 jyldyq mereitoiyna arnalǵan «Alashtyń asyl perzenti» atty halyqaralyq ǵylymi-tájiribelik konferentsiiaǵa kelgen ǵalymdarmen kezdesti.
Bul týraly OQO ákiminiń baspasóz qyzmeti habarlady.
Qonaqtardyń qatarynda QR Syrtqy ister ministrliginiń erekshe tapsyrmalar jónindegi elshisi Jalǵas Ábildaev, Saýd Arabiiasy elinen kelgen arab-orys aqparat ortalyǵynyń direktory, professor Madjid ibn Abdýl Azaz at -Týrki, QR UǴA-nyń Qurmetti akademigi, halyqaralyq N.Tórequlov atyndaǵy qaiyrymdylyq qorynyń prezidenti Ájdijappar Saparbaev, tarih ǵylymdarynyń doktory, professor Kahramon Radjabov, Tájikstan Respýblikasy kásipkerlik jáne servis institýtynyń professory Hotamov Namoz syndy túrki álemine tanymal ǵalymdar bar.
Kezdesý barysynda sóz alǵan oblys ákimi ǵylymi-tájiribelik konferentsiianyń sátti ótýine tilektestigin jetkizdi.
«Búgin mine rýhani astanamyz - Túrkistan qalasynda memleket jáne qoǵam qairatkeri Názir Tórequlovtyń 125 jyldyq mereitoiyna arnalǵan «Alashtyń asyl perzenti» atty halyqaralyq ǵylymi-tájiribelik konferentsiiasyn ótkizgeli otyrmyz. Qazaqtan shyqqan tuńǵysh kásibi, bilikti diplomat, elshimizdiń esimi kózi tirisinde-aq halyqaralyq deńgeide tanylyp, joǵary baǵalanǵanyn bilemiz. Aldaǵy ýaqytta qairatkerdiń diplomatiialyq murasyn ǵylymi turǵydan zertteýge erekshe mán berýimiz qajet», - dedi Janseiit Qanseiituly.
Názir Tórequlov 1928-1936 jyldary sol kezdegi eń joǵary diplomatiialyq ataq - KSRO Bas konsýly, Tótenshe jáne ókiletti ókil degen laýazymmen Keńes Odaǵynyń Saýd Arabiiasyndaǵy elshisi qyzmetin atqarǵan. Segiz tildi jetik meńgergen ol Djiddada tirkelgen Batys Evropa elderi diplomattarymen qoian-qoltyq jumys istep, sol kezeńde týyndaǵan kúrdeli máselelerdi ońtaily sheship otyrǵan.
Kezdesý barysynda QR Syrtqy ister ministrliginiń erekshe tapsyrmalar jónindegi elshisi Jalǵas Ábildaev sóz alyp, oblys ákiminiń keýdesine Názir Tórequlov atyndaǵy tósbelgini taqty. Munan soń memleket jáne qoǵam qairatkeri Qýanysh Aitahanov, halyqaralyq N.Tórequlov atyndaǵy qaiyrymdylyq qorynyń prezidenti Ájdijappar Saparbaevtar sóz alyp, búgingi sharanyń mańyzdylyǵyna toqtaldy.
Kezdesý sońynda oblys ákimi 60 jasqa tolyp otyrǵan filologiia ǵylymdarynyń kandidaty, jazýshy, dramatýrg Joltai Álmashulyn quttyqtap, syi-qurmet kórsetti.
