Elbasy N.Nazarbaev óziniń «Bolashaqqa baǵdar: rýhani jańǵyrý» atty maqalasynda jas urpaqtyń boiyna týǵan jerge degen súiispenshilikti sińirý máselesine erekshe nazar aýdarǵany belgili. Ol úshin óńirdegi kieli mekender men tabiǵaty keremet oryndardy jastar arasynda nasihattaý qajet. Osyǵan orai, M.Áýezov atyndaǵy OQMÝ tarih, arheologiia, geografiia, murajai isi jáne eskertkishterdi qorǵaý mamandyqtarynyń stýdentteri oqytýshylarmen birge Ortalyq Aziiadaǵy eń úlken qoryqtardyń biri – «Aqsý-Jabaǵyly» qoryǵynda bolyp qaitty. Qoryqtyń ataýy Aqsý jáne Jabaǵyly ózenderi ataýynyń birigýinen paida bolǵan.
Jol nusqaýshymen birge biz 12 shaqyrymdy júrip ótip, teńiz deńgeiinen 1 760 metr biiktikke deiin kóterildik. Sharshaý jáne kúrdeli jolǵa qaramastan, biz Talas Alataýynyń silemderi bastalar tustaǵy Jetimsai shatqalyndaǵy Kishi Qaiyńdyǵa da kelip jettik. Bul jerdiń tastarynyń ornalasýyna tańqalmaý múmkin emes. Týra bireý dalaǵa ádeiilep qoiyp shyqqandai rettilikpen ornalasqan. Qatar tizilgen qalyń jasyl shyrshalar da kózdiń jaýyn alady. Árine, Aqsý-Jabaǵyly sarqyramasynyń ózi de biikten qaraǵan adamǵa taýdan tómen qarai syrǵyǵan qar kóshkini ispetti kórinedi. Al, aqyr aiaǵynda aq buyrqasyny quddy bireý sýsabyn qosyp qoiǵandai kóz tamsandyrady. Bul shatqalda aiýlardy kezdestirip qalýyńyz da múmkin eken. Jol boiynda tipti qonjyqtardyń izderin de baiqadyq, sondyqtan shatqalda saq bolý kerek.
Tumsa tabiǵattyń syryna tańdana júrip qaitar jolda qoryqqa kirer tustaǵy murajaiǵa soqtyq. Onda bizge «Ólketaný» páninen aitylǵan málimetterdi kózben kórdik. Sonymen qatar murajaida qoryqtyń úsh kezeńine arnalǵan ekspozitsiialyq zaldardy araladyq. Sonyń ishinde erekshe qorǵaýǵa alynǵan aimaqtyń jer bederi men tabiǵaty erekshe qyzýshylyq týdyrdy. Qatyrylǵan janýarlar men qustar, gerbariiler shyny sórelerden óz oryndaryn aldy.
«Aqsý-Jabaǵyly» qoryǵy janýarlar men ósimdikterge óte bai. Tabiǵattyń bul bailyǵyn saqtap qalý úshin ony qorǵaýymyz qajet. Ekskýrsiia barysynda bizdiń kafedranyń stýdentteri kóp nárseni úirendi jáne paidaly aqparattar aldy.
Bul sapar bizge kóptegen emotsiialar, jyly sátterdi jáne ómirdi basqa da qyrlarynan kórýge múmkindik berdi.
Móldir AMANBAEVA,
M.Áýezov atyndaǵy OQMÝ-diń jalpy tarih jáne murajai isi kafedrasynyń oqytýshysy.
