QR Indýstriia jáne infraqurylymdyq damý ministrligi (QR IIDM) oq-dárilerdi joiý kezinde jiberilgen zańsyzdyqtar úshin «Qaztehnologiialar» AQ-ǵa qatysty qozǵalǵan qylmystyq iske túsinik berdi, dep habarlaidy "Ult aqparat".
«3 naýryzda birqatar BAQ-ta oq-dárilerdi kádege jaratý kezindegi yqtimal urlaý oqiǵasy boiynsha «Qaztehnologiialar» AQ-ǵa qatysty qylmystyq is qozǵalǵany týraly aqparat taratyldy. Osyǵan orai atalǵan aqparatta qarastyrylǵan oqiǵalar 2013-2017 jyldar kezeńin qozǵaitynyn aita ketý kerek.
Jalpy «Qaztehnologiialar» AQ 2011 jyldan bastap QR Qarýly Kúshteriniń paidalanylmaityn oq-dárilerin kádege jaratýmen ainalysady. Kásiporyn sol jyldan bastap Qorǵanys ministrliginiń enshiles uiymy bolyp, 2016 jylǵy qarashada jańadan qurylǵan QR Qorǵanys jáne aeroǵarysh ónerkásibi ministrligine, al 2019 jylǵy qańtarda qaita qurylǵan Tsifrlyq damý, qorǵanys jáne aeroǵarysh ónerkásibi ministrligine berildi. Qorǵanys ónerkásibi salasyndaǵy memlekettik basqarý júiesin reformalaý maqsatynda 2019 jylǵy maýsymda QR Indýstriia jáne infraqurylymdyq damý ministrligine bekitildi», - dep túsindirdi QR IIDM-nen.
Atap ótilgendei, 2015 jyly jasalǵan ótpeli kelisimsharttarǵa sáikes «Qaztehnologiialar» AQ oq-dárilerdi kádege jaratý boiynsha sharttyq mindettemelerin 2017 jyly oryndap bitken. Al 2018 jyly kádege jaratý jumystary júrgizilgen joq.
«Joǵaryda aitylǵan aqparattaǵy faktilerge qatysty taǵy mynany atap ótken jón: oq-dárilerdi kádege jaratý kezinde qaitalama qara jáne tústi metaldar synyqtary bólinedi. Odan ári kádege jaratylýy tiis ónimder qaitalama metall synyqtarynyń baǵasy boiynsha taýarlyq-shikizattyq birja arqyly ótkizilip otyrdy. Qaitalama metall synyqtarynda túrli qospalardyń bolýyna bailanysty ótkizý kezinde olardyń baǵasy taza metalmen salystyrǵanda tómendetiledi. Tergeý organdary osy faktini qaitalama metall synyqtaryn ótkizý kezinde baǵany tómendetý yqtimaldyǵy retinde tekserýde», - dedi ministrlikten.
Budan bólek, vedomstvo málimetinshe, qaitalama metall synyqtaryn baǵalaýdy memlekettik satyp alýlar konkýrsynda jeńip shyqqan ózge uiymdar júrgizgen.
«2019 jyly Indýstriia jáne infraqurylymdyq damý ministrligine berilgen sátten «Qaztehnologiialar» AQ kádege jaratý ónimderin (qaitalama synyq) ótkizýdi Qazaqstan Respýblikasynyń qoldanystaǵy zańnamasyna sáikes memlekettik elektrondyq portal arqyly júzege asyrady. Bul rásim taza ótkiziledi. 2019 jyly «Qaztehnologiialar» AQ 306 mln. teńge somasynda paidalanylmaityn oq-dárilerdi kádege jaratty jáne memleket biýdjetine kádege jaratý ónimderin ótkizý nátijesinde 416 mln. teńge qaitardy.
Qazirgi ýaqytta tergeý organdary tekserýdi jalǵastyrýda. Ártúrli saraptamalar júrgizilip jatyr», - dep túidi QR IIDM-nan.
Eske salaiyq, buǵan deiin QR Indýstriia jáne infraqurylymdyq damý ministrligine qarasty «Qaztehnologiialar» AQ-da Arys pen Otar qalalarynda áskeri bólimderdiń soǵys oq-dárilerin joiý barysynda metall synyqtary men metaldardy satý arqyly 1,7 mlrd teńge qarajatty urlaý faktisi anyqtalǵany habarlanǵan bolatyn.
