Elordada Onkologiiadaǵy Dúniejúzilik kóshbasshylar sammitinde QR Densaýlyq saqtaý ministri Eljan Birtanov Qazaqstanda onkologiialyq aýrýlardyń aldyn alý sharalary týraly aitty, dep habarlaidy QazAqparat.
«Búgingi shara Qazaqstan densaýlyq saqtaý júiesinde mańyzdy tarihi oqiǵa bolyp sanalady. Sebebi bul onkologiia boiynsha Ortalyq Aziiada jáne TMD elderi arasynda joǵary deńgeili alǵashqy shara bolyp otyr. Sońǵy 10 jyl boiy Qazaqstan Halyqaralyq obyrǵa qarsy odaq (UICC) múshesi bolyp keledi. Atap aitqanda, onkologiialyq aýrýlarmen kúres máselesi Qazaqstannyń áleýmettik saiasatynda únemi basymdyqty baǵytqa ie bolyp otyr», - dedi Eljan Birtanov.
Sonymen qatar vedomstvo basshysy 2018 jyly elimizde qaterli isik onkologiialyq aýrýlarmen kúres boiynsha tórt jylǵa arnalǵan keshendi jospar ázirlengenin eske saldy. Jospardy júzege asyrýǵa 35 mlrd teńge qarastyrylǵan.
«2018 jyly Qazaqstanda onkologiialyq aýrýlardyń skriningtik baǵdarlamalaryn engizdik, 2016 jyly atalǵan skriningtik baǵdarlamalar Dúniejúzilik densaýlyq saqtaý uiymynyń Yqpal etý missiiasymen zerttelip, jańartyldy. Qazirgi kezde biz aqysyz túrde qaterli isikti erte kezeńde anyqtaý boiynsha skriningter júrgizýdemiz. Onkologiialyq aýrýlarmen kúres boiynsha keshendi jospar aiasynda erler men áielder úshin tekserilý kabinetterin uiymdastyrdyq, olardyń sany 539-den 1284-ke deiin artty», - dedi Eljan Birtanov.
Budan buryn habarlanǵandai, búgin elordada Onkologiiadaǵy Dúniejúzilik kóshbasshylar sammitiniń jumysy bastaldy. Sharaǵa 70 elden 350 delegat qatysyp jatyr.
