Syrboiylyqtar Rio Olimpiadasynyń qola júldegeri ziltemirshi Aleksandr Zaichikovti zor qoshemetpen qarsy aldy.
Qyzylordalyq jastar Aleksandrdyń qurmetine áýejaiǵa jinalyp, ystyq yqylastaryna bóledi. Munan soń Rio Olimpiadasynyń júldegerin oblys ákimi Qyrymbek Kósherbaev quttyqtap, jyly lebizin jetkizdi.
- Olimpiadada sen tek ziltemirdi kóterip qana qoiǵan joqsyń, búkil qazaqstandyqtardyń rýhyn asqaqtattyń. Aleksandrdyń kelesi medali altyn bolatynyna senemin. Biz Aleksandrdyń aldaǵy jarystarǵa, ásirese Tokioda ótetin Olimpiadaǵa daiyndyǵy úshin barlyq jaǵdaidy jasaýǵa daiynbyz. Sonymen qatar, batyr uldy tárbielep, ósirgen anasyna zor alǵys aitamyz, - dedi oblys ákimi.
Oblys ákimi Qyrymbek Kósherbaev aldaǵy ýaqytta ziltemirshilerdi daiyndaý úshin Qyzylordada halyqaralyq talaptarǵa sai aýyr atletika ortalyǵy salynatyndyǵyn jetkizdi.
- Men barlyq qazaqstandyqtarǵa, ásirese jerlesterime úlken alǵysymdy aitamyn. Rioda júrip, olardyń qoldaýyn sezindim. Qyzylordalyqtar tańǵy 4-te jinalyp, meniń ónerimdi tamashalaǵandaryn bilemin. Sizderdiń qoldaýlaryńyz maǵan kúsh berdi, - deidi Aleksandr Zaichikov.
Aleksandrdyń anasy men bapkeri de barsha qoldaý kórsetken qazaqstandyqtarǵa, jerlesterine alǵystaryn aitty.
Munan soń aimaq basshysy Aleksandrǵa «Toyota Land Cruiser » avtokóliginiń kiltin tabystap, bapkerine 5 mln. teńgeniń sertifikatyn tapsyrdy.
Oblys ákimimen kezdesýden keiin Aleksandr ortalyq alańda óziniń jankúierlerimen kezdesti.
