Niý-Iorkte úndi tekti britandyq jazýshy Salman Rýshdige shabýyl jasaldy. Bul týraly Bloomberg agenttigi habarlady, dep jazady Massaget.kz portaly.
Habarda aitylǵandai, Rýshdi Chautauqua institýtynda dáris oqýy kerek bolǵan. Dáris bastalar aldynda sahnaǵa belgisiz bireý júgirip shyǵyp, Rýshdidi pyshaqtai bastaǵan. Ol tutqynǵa alyndy. Politsiia kúdiktiniń 24 jastaǵy Hadi Matar ekenin, Niý-Djersi shtatynyń Ferviý qalasynan kelgenin anyqtady.
Dáriger zalda jazýshyǵa alǵashqy kómek kórsetken, sodan keiin ony tikushaqpen aýrýhanaǵa jetkizgen.
Jańa aqparat boiynsha, Rýshdige birneshe saǵat boiy ota jasalǵan. Jazýshy jasandy demaldyrý apparatyna qosylǵan.
"Jańalyq jaqsy emes. Salman bir kózinen aiyrylýy múmkin, qolyndaǵy júike tamyrlary úzilip, baýyry zaqymdalǵan", - dedi onyń kitap agenti Endriý Ýaili.
Shabýyl kezinde sharanyń moderatory Genri Riz de basynan jeńil jaraqat aldy.
Politsiia óltirýdiń sebebin anyqtaý úshin federaldy tergeýshilermen jumys istep jatqanyn aitty. Olar qandai qarý qoldanylǵanyn sipattamady.
1980 jyldary ol "Ibilis óleńderi" romanyn jazǵannan keiin shiit musylmandarynyń qaharyna ushyrady. Irannyń dini jetekshisi aiatolla Homeini Salman Rýshdidi óltirý týraly pátýa shyǵardy.
Rýshdi on jylǵa jýyq jasyrynyp júrdi. Romannyń japon tiline aýdarǵan Hitoshi Igarashi 1991 jyly óltirildi. 1998 jyly Iran úkimeti pátýany budan bylai qoldamaitynyn aitty, al Rýshdi keiingi jyldary salystyrmaly túrde ashyq ómir súrdi.
Jazýshy AQSh azamattyǵyn 2016 jyly alǵan.
Aita keteiik, Ser Ahmed Salman Rýshdi (aǵylsh. Ahmed Salman Rushdie, Ýrdý أحمد سلمان) “Tún ortasyndaǵy balalar” romany úshin 2008 jyly “Býker” syilyǵyn ielengen. Rytsar-bakalavr. Koroldik ádebi qoǵamnyń múshesi. Synshylar atalǵan jazýshyny magiialyq realizm ádisin qoldanatyn qalamgerler qataryna jatqyzady.
Salman Rýshdi 1947 jyly 19 maýsymda Bombeide Kashmiri tektes musylman otbasynda dúniege keldi. Onyń atasy ýrdý tilinde jazǵan aqyn bolǵan. 14 jasynda Angliiaǵa oqýǵa ketip, keiinnen King kolledjinde, Kembridj ýniversitetinde tarihty oqydy. Teatrda, sodan keiin jýrnalist retinde jumys istedi. 1964 jyly Ulybritaniia azamattyǵyn aldy.
2004 jyldan 2006 jylǵa deiin ol AQSh-tyń Halyqaralyq PEN ortalyǵynyń prezidenti boldy.
2008 jyldyń 10 shildesinde Londonda internettegi oqyrmandardyń daýys berýiniń nátijeleri boiynsha Salman Rýshdi “Býker” syilyǵynyń nominattary arasynda úzdik dep tanyldy. Onyń balalaryna (Rýshdidiń ózi rásimge qatysa almady) Býkerdiń arnaiy syilyǵy men 50 myń fýnt sterling berildi.
