BUU-nyń Niý-Iorkte ótip jatqan 74-shi Bas Assambleiasy aiasynda Bas Assambleianyń Tóraǵasynyń jetekshilgimen «Jappai densaýlyq saqtaý qyzmetterimen qamtamasyz etý: salaýatty álem qurý boiynsha birlesken kúsh-jiger» máselesi boiynsha joǵary deńgeidegi otyrys ótti.
Otyrysta Jappai densaýlyq saqtaý qyzmetimen qamtýǵa arnalǵan Saiasi deklaratsiia qabyldandy, dep habarlaidy QR Densaýlyq saqtaý ministrliginiń baspasóz qyzmeti.
Ministr Eljan Birtanov Niý-Iorkte BUU Bas Assambleiasy aiasynda ótken said-iventte «Jappai densaýlyq saqtaý qyzmetterimen qamtamasyz etý jáne turaqty damýǵa qol jetkizýge arnalǵan meditsinalyq-sanitarlyq alǵashqy kómek» taqyrybynda baiandama jasady.
Is-sharany QR Densaýlyq saqtaý ministrligi AQSh-tyń Densaýlyq saqtaý jáne áleýmettik qyzmet ministrligimen birlesip uiymdastyrdy. Jiynǵa álem elderinen júzden astam adam qatysty. Olardyń ishinde halyqaralyq uiymdardyń kóshbasshylary, BUU-ǵa múshe elderdiń densaýlyq saqtaý jáne syrtqy ister ministrleri, ǵalymdar, osy saladaǵy sarapshylar boldy.
Otyrysta DDSU bas direktory Tedros Adhan Gebreiesýs, IýNISEF atqarýshy direktory Genrietta For, Halyqaralyq Elektr bailanysy odaǵynyń Bas hatshysy Chjao Hoýlin, AQSh Densaýlyq saqtaý jáne áleýmettik qyzmet ministri Aleks Azar jáne Dúniejúzilik Banktiń Densaýlyq saqtaý, tamaqtaný jáne halyqty qonystandyrý máseleleri jónindegi jahandyq sektorynyń direktory Mýhammad Ali Pate sóz sóiledi.
«Búgin qabyldanǵan JDSQQ (jappai densaýlyq saqtaý qyzmetimen qamtamyz etý) boiynsha jańa saiasi deklaratsiiada MSAK adamdardyń dene jáne psihikalyq densaýlyǵyn, áleýmettik ál-aýqattyn jaqsartatyn inkliýzivtik, tiimdi jáne pármendi tásil dep jazylǵan. Sonymen qatar, Almaty jáne Astana deklaratsiiasy boiynsha MSAK jappai densaýlyq saqtaý qyzmetterimen qamtamasyz etý jáne turaqty damýdyń irgetasy»,-dedi Eljan Birtanov.
Sonymen qatar, ministr Qazaqstan Úkimeti úshin adamdardyń densaýlyǵy eń joǵary ulttyq qundylyq bolyp qala beretinin atap ótti.
Qazaqstan Konstitýtsiiasy barlyq azamattar men elimizge kelýshilerge memleket qarjylandyratyn tegin meditsinalyq kómekke kepildik beredi. JDSQQ (jappai densaýlyq saqtaý qyzmetimen qamtamyz etý) qosymsha meditsinalyq qyzmetter arqyly odan ári keńeitý maqsatynda 2020 jyldyń qańtarynan bastap Mindetti áleýmettik meditsinalyq saqtandyrý iske qosylady.
«Meditsinalyq saqtandyrý reformasy meditsinalyq kómektiń qoljetimdi bolýyna, sapasynyń jaqsarýyna yqpal etedi jáne halyqtyń densaýlyǵyna jumsaityn shyǵynyn eki esege qysqartady. Osy reforma arqyly densaýlyqty nyǵaitýǵa jáne aýrýlardy erte anyqtaýǵa múmkindik týady, al azamattardyń óz densaýlyǵy úshin áleýmettik jaýapkershiligin arttyramyz dep úmittenemiz», - dedi Eljan Birtanov.
