Niý-Iork politsiiasynan Qazaqstan azamatynyń ustalǵandyǵy týraly resmi aqparat túsken joq. Bul týraly búgin QR Syrtqy ister ministrliginiń resmi ókili Aibek Smadiiarov aitty, dep habarlaidy QazAqparat.
«Niý-Iorkte Qazaqstan aýmaǵynda izdeýde júrgen qazaqstandyq azamattyń ustalǵandyǵy týraly aqparatqa orai mynany aitqym keledi. Ázirshe, Niý-Iork politsiiasynan resmi aqparat bizge kelip túsken joq», - dedi resmi ókil.
Onyń atap ótýinshe, qazirgi ýaqytta amerikalyq tarap zańsyz kóshi-qonmen kúres júrgizip jatyr jáne el aýmaǵynda júrgen zańsyz migranttardy anyqtaý úshin únemi reidter ótkizip turady.
«Keide amerikalyq politsiia bizdiń azamattardy ustaǵanymen mán-jai anyqtalǵannan soń jibere salady. Alaida ony bizdiń diplomatiialyq ókildigimizge habarlamaidy. Osyndai da jait oryn alýy múmkin», - dedi Aibek Smadiiarov.
Buǵan deiin AQSh-tyń Niý-Iork qalasyndaǵy Kóshi-qon jáne keden basqarmasynyń qyzmetkerleri 12 sheteldik qashqyndy ustaǵanyn, onyń arasynda Qazaqstan azamaty da bar ekendigin habarlaǵan bolatynbyz.
