Salyq kodeksine engiziletin jańa normalar kásipkerlerge salyq júktemesin arttyrmaidy. Bul týraly búgin Májilistiń jalpy otyrysynda Palata Tóraǵasy Nurlan Nyǵmatýlin aitty, dep habarlaidy QazAqparat.
Depýtattar Salyq kodeksine engiziletin ózgerister týraly zań jobasyn birinshi oqylymda qaraý barysynda mobildi tólemderdi retteýge qatysty normalardy qarastyrdy.
Májilis depýtattary tarapynan tutynýshylar men kásipkerler úshin jańa normanyń ne beretini jáne kásipkerlerge salynatyn salyq júktemesi týraly máseleler kóterildi.
Nurlan Nyǵmatýlin atalǵan norma boiynsha salyqtyń jańa túri engizilmeitinin alǵa tartyp, kásipkerlerge salyq júktemesi ózgermeitinin aitty.
Sonymen qatar, otyrys barysynda depýtattar kólik salyǵyna qatysty birqatar máselelerdi ortaǵa saldy. Atap aitqanda, búginde «Gazelderge» salyq salý avtomobil qozǵaltqyshy kólemine emes, júk kótergishtigine bailanysty belgilengen mólsher boiynsha tólenedi. Bul norma elimizdegi 96 myń avtokólikke qatysty bolmaq. Osyǵan bailanysty atalǵan normanyń 2021 jylǵy 1 qańtardan bastap kúshine enýi usynylady.
Aita ketetin jaǵdai, avtokólik salyǵyn tóleý merzimi zańdy tulǵalar úshin 2021 jyldyń 5 shildesinde aiaqtalsa, jeke tulǵalar men jeke kásipkerler úshin merzimi 2022 jylǵy 31 naýryzda bitedi. Sondyqtan da salyqty tólegen avtokólik ieleri úshin qaita esepteýler qajet.
Osyǵan sáikes, Májilis tóraǵasy avtokóliktiń modeline qatysty salyq 2 esege, al jekelegen jaǵdailarda 6 esege deiin azaiatynyn aitty. Ár avtokólik iesi úshin salyq 5 myń teńge men 115 myń teńge kólemi aralyǵynda qaitarylatyn bolady.
Nurlan Nyǵmatýlin atap ótkendei, qazir eń bastysy memlekettik organdar osy zańnamalyq normanyń retrospektivtiligin eskere otyryp, barlyq qajetti esepteýlerdi jedel, biýrokratiiasyz júrgizý kerek.
Osyǵan sai, Palata Spikeri 1,5 aidan keiin zań kúshine enetinin, 90 myńnan asa avtokólik iesiniń 2021 jylǵa arnalǵan salyǵyn qaita esepteitinine toqtalyp, bul esepteýler avtokólik ieleriniń qatysýynsyz ótetinin, sondyqtan, azamattar osy jaiynda erterek bilý kerektigin aitty.
Nurlan Nyǵmatýlinniń pikirinshe, barlyǵy avtomatty túrde jasalatynyn, eshqaida barýdyń jáne ótinish jazýdyń qajeti joq ekeni týraly halyqty aldyn ala habardar etý qajet.
Qazir tiisti deńgeide túsindirý jumystary uiymdastyrylmasa, adamdar halyqqa qyzmet kórsetý ortalyqtaryna baryp, Koll-ortalyqtarǵa úzbei qońyraý shalyp, memlekettik organdardyń blogtaryna ótinishter qaldyrady, - dedi Palata Spikeri.
Aita ketý kerek, zań jobasy mobildik tólemderdi retteý, salyq tóleýshiniń pasportyn engizý jáne júk avtomobilderi úshin belgilengen mólsherlemeler boiynsha jekelegen kólik quraldaryna salyqty esepteý quqyǵyn berý jáne basqa da birqatar jańa normalardy qamtyǵan.
