QR Parlamenti Májilisiniń tóraǵasy Nurlan Nyǵmatýlin zań jobasyna sybailas jemqorlyqqa jol bergeni úshin sportshylardyń, jattyqtyrýshylardyń jarys uiymdastyrýshylarynyń jazasyn tómendetý týraly ózgeris engizgen QR Mádeniet jáne sport ministrligin synǵa aldy, dep habarlaidy Baq.kz agenttigi.
QR Parlamenti Májilisiniń jalpy otyrysynda QR Ákimshilik quqyqbuzýshylyq týraly Kodeksine ózgerister men tolyqtyrý engizý týraly zań jobasyn qaraý barysynda depýtat Záýresh Amanjolova Mádeniet jáne sport ministrligine saýalyn qoidy.
«Sońǵy ýaqytta qoǵamnyń nazary doping, kelisilgen matchtar, jarystardyń tyiym salynǵan ádisteri sekildi sport mańaiyndaǵy máselelerge aýdy. Osynyń bári álemdik trendke sai belsendi túrde sporttan alastatylyp jatyr. Biraq Qazaqstanda jaǵdai basqasha. Jaqynda ǵana osy jerde Úkimet engizgen las sporttyń jolyn jabýdy kózdeitin dene shynyqtyrý jáne sport týraly zań jobasyn qaradyq. Onda sportshylardyń, jattyqtyrýshylardyń, sondai-aq jarys uiymdastyrýshylarynyń jaýapkershiligin qatańdatatyn túzetýler engizildi. Búgin sportshylar men jarys uiymdastyrýshylaryn paraǵa satyp alǵany úshin aiyppuldy 200 AEK-tan 100 AEK-qa deiin tómendetý, sondai-aq osy quqyqbuzýshylyq úshin ákimshilik qamaqtan alyp tastaý týraly usynysyn zańnamada qarastyryp otyrmyz. Budan bólek zańsyz syiaqy bergen adamnyń jaýapkershiligi osy syiaqyny alǵan adamǵa qaraǵanda eki ese azaimaq. Meniń suraǵym, qazirgi redaktsiiadaǵy 174-bapty saqtap qalý qajet dep sanamaisyz ba?», - dedi Záýresh Amanjolova.
Ádilet ministri Marat Beketaev bul bapty saqtap qalý qajet ekenin jáne túzetýdi ózi basqaratyn ministrlik engizbegenin aitty.
Mádeniet jáne sport vitse-ministri Erlan Qojaǵapanov osy normany zań jobasyna engizgen adamdy jaýapqa tartatynyn aitty.
«Elimizdegi sport federatsiialarynyń birin (fýtbol federatsiiasy – avt.) basqarǵan adam retinde bul máseleni bilemin. Bul jas sportshylarǵa jáne jankúierlerge zalalyn tigizedi. Qazirgi Kodekstegi normanyń saqtalýyn qoldaimyz. Ministrligimizde bul normany kim engizgenin anyqtap, jaýapqa tartatyn bolamyz. Depýtattarǵa osyndai máseleni aitqandary úshin alǵys aitamyn. Jankúierlerimiz ben jas sportshylarymyzdyń aldynda qyzarǵymyz kelmeidi. Bul normany qylmystyq jaýapkershilikke deiin qatańdatý qajet», - dedi Qojaǵapanov.
Májilis spikeri Nyǵmatýlin «áp-sátte ózgerip shyǵa kelgen» áriptesin synǵa aldy.
«Muny qashan jasaǵandaryńyzdy kúnine deiin aityp bere alamyn. Mine, keshe keshke jumys tobyna kelip túsken hat. Endi kenet qamaqqa alý men qylmystyq jaýapqa tartýǵa deiin qatańdatýdy suraisyzdar. Bul máseleni túsinetinińiz jaqsy. Baiandaǵanyńyz durys. Bir ai buryn sizge bos málimdemeden iske kóshý kerek dedim. Bul jái aitylǵan sóz emes. Búgingi jaǵdai muny rastap otyr. Ókinishke qarai, ministrlik basshylyǵy tek resmi aitady, al bir aidan soń sporttaǵy jetistikterge jetýde tyiym salynǵan ádistermen kúresýge shaqyrady. Al endi ministrlik kelisilgen jeńister, matchtar jaýapkershilikti tómendetý týraly zań jobasyn alyp keledi», - dedi Májilis tóraǵasy.
Nurlan Nyǵmatýlin áriptesterine bos áńgimeden iske kóshetin kez kelgenin aitty.
«Sonda júielilik qaida? Sportyq jetistikterdiń tazalyǵy úshin kúresetinderińiz qaida? «Qyzarǵymyz kelmeidi» degen neni bildiredi. Sizderge, tipti, osyndai jumystaryńyz úshin uiat. Bir ai buryn basqa pozitsiia, endi basqa. Jurt aldynda taǵy da aitamyn, ókinishke qarai, tek resmi málimdeisizder. Al negizinde biz basqany kórip otyrmyz. Naqty pozitsiialaryńyz bolýy kerek, túsinip tursyz ba? Taǵy da qaitalaimyn, bos sózdi qoiaiyq. Ministrlik osy máselede iske kóshetin kez keldi», - dedi ol.
