Búgin Májiliste Palata tóraǵasy Nurlan Nyǵmatýlin Ulybritaniia jáne Soltústik Irlandiia Qurama Koroldiginiń Qazaqstan Respýblikasyndaǵy Tótenshe jáne Ókiletti Elshisi Maikl Giffordpen kezdesti, dep habarlaidy "Ult aqparat" Májilistiń baspasóz qyzmetine silteme jasap.
Taraptar eki el arasyndaǵy yntymaqtastyqty damytýdyń ózekti máseleleri boiynsha pikir almasty.
Sonymen qatar, kelesi jyly Qazaqstan men Britaniia arasyndaǵy diplomatiialyq qatynastardyń ornaǵanyna 30 jyl tolatynyn atap ótken Palata spikeri osy jyldar ishinde elder arasynda senimdi saiasi dialog ornaǵanyn, saýda-ekonomikalyq jáne mádeni-gýmanitarlyq yqpaldastyqtyń belsendi damyǵanyn jetkizdi.
Kezdesý barysynda Májilis tóraǵasy Qazaqstannyń Tuńǵysh Prezidenti Nursultan Nazarbaev jáne Memleket basshysy Qasym-Jomart Toqaevtyń Qazaqstan-Britan yntymaqtastyǵyn nyǵaitýǵa qosqan úlesi elder arasyndaǵy strategiialyq áriptestiktiń jańa kezeńine shyǵýǵa múmkindik bergenine nazar aýdardy.
Nurlan Nyǵmatýlinniń aitýynsha, qazirgi ýaqytta qos memleket arasyndaǵy jańa strategiialyq áriptestik jáne yntymaqtastyq týraly kelisimdi qabyldaý úshin belsendi jumys júrgizilýde.
Óz kezeginde, Maikl Gifford eki jaqty qarym-qatynastyń deńgeiin joǵary baǵalap, ekonomikalyq seriktestik pen parlamentaralyq bailanysty damytýdyń mańyzdylyǵyna toqtaldy. Sondai-aq, Elshi Qazaqstannyń Prezidenti Qasym-Jomart Toqaev júrgizip otyrǵan reformalardy qoldaitynyn jetkizdi.
Nurlan Nyǵmatýlin men Maikl Gifford qazaqstandyq jáne britandyq Parlament ókilderi arasyndaǵy dialogty jandandyrý eki el úshin de tiimdi bolatynyna senim bildirdi.
