Túrkitildes elderdiń Parlament ókilderi zamanaýi jahandyq syn-qaterleri aiasynda barlyq máseleler boiynsha ózara is-qimyldy kúsheitýge nietti. Bul túrkitildes elder Parlamenttik Assambleiasynyń H plenarlyq otyrysynyń qorytyndysy boiynsha qabyldanǵan Túrkistan deklaratsiiasynda kórinis tapty, dep habarlaidy "Ult aqparat" tómengi palatanyń baspasóz qyzmetine silteme jasap.
Májilis Tóraǵasy Nurlan Nyǵmatýlin atap ótkendei, bul tarihi qujat qol jetkizilgen nátijelerdi bekitip qana qoimai, bolashaqqa degen josparlardy da kórsetedi.
Májilis Tóraǵasy qasietti qara shańyraq, búkil «Túrki áleminiń rýhani astanasy» kieli Túrkistan jerine kelip, mańyzdy jiynǵa qatysqandary úshin shyn júrekten alǵysyn bildirdi. Sondai-aq, TúrkPA-nyń mereitoilyq sharalary baýyrlas elder arasyndaǵy saiasi, ekonomikalyq, áleýmettik jáne mádeni bailanystardy parlamenttik deńgeide odan ári nyǵaitýǵa arnalǵanyn málim etti.
Palata spikeriniń aitýynsha, Túrkistan deklaratsiiasy bul tarihi qujat búkil túrki elderiniń Atajurty, rýhani Astanasy kieli Túrkistan jerinde qabyldanǵany elderimiz arasyndaǵy dostyqqa, týystyqqa, syilastyqqa jańa serpin beredi.
Nurlan Nyǵmatýlin atap ótkendei, Túrkistan deklaratsiiasy TúrkPA-nyń negizin qalaýshy, Qazaqstan Respýblikasynyń Tuńǵysh Prezidenti, Elbasy Nursultan Ábishuly Nazarbaevtyń teńdessiz joǵary rólin baǵalap, tarihi úlesin erekshe kórsetti.
- Endi múshe elderimizdiń barlyq sala boiynsha yntymaqtastyǵyn nyǵaitý, uiymnyń halyqaralyq mártebesin kúsheitý, túrki elder birligin tereńdetý - osynyń barlyǵy aldaǵy bir jyldyń ishinde bizdiń jumystarymyzdyń eń mańyzdy baǵyttary bolady. Jáne muragerlikti saqtap, TúrkPA-ǵa múshe memleketter aiasyn keńeitýge de basa nazar aýdaratyn bolamyz, - dedi Palata spikeri.
Sondai-aq, Nurlan Nyǵmatýlin osy jiynda biz alǵash ret elektrondyq saýda, energetikalyq resýrstardy tiimdi paidalaný jáne energetikalyq tiimdilik, kinematografiia máseleleri boiynsha halyqaralyq modeldik zańdar qabyldaǵanyn atap ótip, osynyń barlyǵy, bizdiń Assambleia jumysyna jańa serpin beretinine senim bildirdi.
Palata Tóraǵasy Ázerbaijannan, Qyrǵyzstannan, Túrkiiadan, Majarstannan, Ózbekstannan kelgen áriptesterine, barsha halyqaralyq uiym múshelerine birlesken tabysty jumys úshin alǵys bildirdi.
Is-shara barysynda Ázerbaijan Respýblikasy Milli Medjlisiniń Tóraiymy Sahiba Gafarova, Qyrǵyz Respýblikasy Jogorký Keneshiniń Tóraǵasy Talant Mamytov, Túrkiia Respýblikasy Uly Ulttyq Jinalysynyń Tóraǵasy Mustafa Shentop sóz sóiledi.
Aita ketý kerek, Túrkistan deklaratsiiasynyń mańyzdy tarmaqtary Elbasynyń tarihi rólin bekitý, elimizdegi Prezidenttik saiasi reformalar paketin qoldaý, qaýipsizdikti nyǵaitý, COVID-19 pandemiiasynyń saldarymen kúreske arnaldy.
