Májilis tóraǵasy Nurlan Nyǵmatýlin elimizdegi bilim berý mekemeleri mamandardy naryq talaptaryna sai daiyndamaitynyn, saldarynan stýdentter mamandyǵy boiynsha jumys taba almai júrgenin ashyq aitty, dep habarlaidy Baq.kz.
Májiliste «Jumyspen qamtý salasynyń problemalary men damý perspektivalary» taqyrybynda ótip jatqan parlamenttik tyńdaýda Nurlan Nyǵmatýlin ózin-ózi jumyspen qamtyp otyrǵan azamattarǵa qatysty máseleni sheshý qajettigin atap ótti.
«Eńbekpen qamtý salasynda jetken jetistikterimiz qatar sheshilmegen suraqtar da az emes. Bul birinshiden ózin-ózi jumyspen qamtyǵan azamattarǵa qatysty. Memleket basshysy olardy esepke alý, kóleńkeli aimaqtan shyǵarý týraly tapsyrma berdi. Bul salada úkimet ortalyq jáne jergilikti memlekettik organdar jáne depýtattyq korpýs birlese jumys isteýi qajet. Búginde depýtattar halyqtyń jumysyn formalizatsiialaý týraly zań jobasy boiynsha jumysqa kiristi», - dedi ol.
Sondai-aq Nurlan Nyǵmatýlin qazirgi tańda bilim berý mekemeleri mamandardy naryq talaptaryna sai daiyndamai otyrǵanyn ashyq aitty.
«Sebebi, kadrlarǵa degen suranysqa bailanysty tereń taldaý jasalmaidy. Bilim berý baǵdarlamary qazirgi talapty tolyq oryndamai otyr. Sol sebepten stýdentter jastarǵa oqýyn bitirgennen keiin mamandaǵy boiynsha jumys tabý qiyn. Osy máseleni sheshý úshin kadrlarǵa degen monitoringiniń tiimdi júiesin qurý qajet dep esepteimiz. Ol memlekettik tapsyrysty durys oryndaýǵa úlken múmkindik beredi», - dedi Májilis tóraǵasy.
Sonymen qatar ol elimizde shaǵyn jáne orta biznesti damytýdyń mańyzdy ekenin jetkizdi.
«Qazirgi ýaqytta biznes salasyna tartý óte mańyzdy. Bul jolda «Atameken» ulttyq kásipkerler palatasy arqyly jumysty júzege asyrýǵa bolady. Búgingi tańda ásirese aýyldyq jerlerde kásipkerlikti damytýdy jáne aýyl turǵyndaryn jumyspen qamtýdy kózdeitin «Bastaý» biznes jobasy iske asyrylyp jatyr. Atalǵan joba arqyly árbir azamatqa jeke kásibin ashyp, onyń damýyna jaǵdai jasalýda», - dedi Nurlan Nyǵmatýlin.
Sóz sońynda Májilis tóraǵasy taǵy bir ózekti máselege toqtaldy.
«Tórtinshi ónerkásiptik revoliýtsiia jumys oryndarynyń qysqarýyna alyp keledi. Osyǵan bailanysty avtomattandyrý jáne tsifrlandyrý kezinde álemde keibir kásipterdiń 30%-ǵa jýyǵy qysqarýy múmkin degen boljam bar. Bul jolda eńbek resýrstaryn basqarý júiesin qalyptastyrý mańyzdy bolyp sanalady. Osy jolda memlekettik organdar azamattyq qoǵam, úkimettik emes uiymdar, kásipkerler birlese jumys jasaýy qajet. Sebebi, azamattardyń ómir sapasyn jaqsartý barshamyzdyń ortaq maqsatymyz», - dedi ol.
Onyń atap ótýinshe, búgingi kúni elimizde 7 millionǵa jýyq jumyskerdiń joǵary jáne orta kásiptik bilimi bar. Ol jumyspen qamtylǵan barlyq azamattardyń 79 paiyzyn quraidy. Bul Qazaqstandaǵy eńbek resýrstarynyń sapasy joǵary ekeniniń dáleli.
