Májilis spikeri Nurlan Nyǵmatýlinniń tóraǵalyq etýimen Parlament Májilisi janyndaǵy Partiiaaralyq keńestiń kezekti otyrysy ótti, dep habarlaidy "Ult aqparat" tómengi palatanyń baspasóz qyzmetine silteme jasap.
Otyrysty ashqan Palata tóraǵasy keńes jumysynyń basty maqsaty mańyzdy máseleler boiynsha parlamenttik jáne parlamenttik emes partiia ókilderimen birlesip, tiisti ortaq sheshimdi qabyldaý ekenin aitty. Nurlan Nyǵmatýlin Májiliske ótpegen partiia ókilderi osy jerde ótip jatqan barlyq is-sharalarǵa belsendi qatysyp júrgenin alǵa tartyp:
«Osy jolda biz jii kezdespesek te, búgingi kúni barlyq partiia ókilderi, sonyń ishinde, Parlamentke kirmegen partiia músheleri, bizdiń zań shyǵarý jumysymyzǵa qatysyp, ózderiniń naqty usynystaryn jetkizip keledi. Osynyń barlyǵy, Memleket basshysy Qasym-Jomart Toqaevtyń «Estitin memleket» tujyrymdamasymen sáikes keledi. Bul óte mańyzdy. Birinshiden, sol úshin, barshańyzǵa alǵysymyzdy bildiremiz. Ekinshiden, osy jumysty odan ári turaqty jalǵastyrýymyz kerek. Sebebi, ol halyqqa qajetti zań qabyldaý úshin de, parlamenttik emes partiialar jumysy úshin de tiimdi dep esepteimiz», - dedi.
Nurlan Nyǵmatýlin atap ótkendei, VII shaqyrylymdaǵy Parlament jumysy bastalǵannan beri Májilistiń qaraýynda barlyǵy 128 zań jobasy boldy. Búginde onyń 80-i maquldanyp, Senatqa joldandy. Májiliske engizilgen barlyq 128 zań jobasy boiynsha Parlamentke enbegen partiialardyń ókilderi jumys toptaryna qatysa otyryp, tujyrymdamalyq usynystaryn beredi. Ol kóbine qoǵamda rezonans týdyrǵan zań jobalaryna, sonymen qatar ekonomikalyq jáne áleýmettik sipattaǵy zań jobalaryna qatysty.
Sonymen qatar, Palata spikeri depýtattardyń Memleket basshysy usynǵan saiasi reformalardy zańnamalyq qamtamasyz etý jónindegi jumystaryn aita kelip:
«Biz «Sailaý týraly» Konstitýtsiialyq Zańǵa ózgerister engizdik. Olar Prezidenttiń Májiliske «ótý shegin» 7-den 5%-ǵa deiin tómendetý, sailaý biýlletenderine «Barlyǵyna qarsy» baǵanyn engizý, sondai-aq, aýyl ákimderiniń tikelei sailaýyn engizý týraly usynystaryn iske asyrýǵa baǵyttalǵan», - dedi.
Májilis tóraǵasy VII shaqyrylym depýtattary maquldaǵan zań jobalardyń ishinde el Prezidenti bastamashylyq jasaǵan sheteldikterge jerdi satýǵa jáne jalǵa berýge tolyq zańnamalyq tyiym salýdy kózdeitin Jer qatynastary máseleleri boiynsha zań jobasyn erekshe atap ótti.
Is-sharada Nurlan Nyǵmatýlin «Qazaqstan Respýblikasynyń sot júiesi men sýdialarynyń mártebesi týraly» Konstitýtsiialyq Zańǵa ózgerister men tolyqtyrýlar, Ákimshilik quqyq buzýshylyq týraly kodekske ózgerister engizilgenine toqtaldy.
Depýtattar «Kvazimemlekettik sektordyń jekelegen sýbektilerin satyp alý týraly» zań jobasyn qarap, maquldady. Onda satyp alýdy júzege asyrýdyń qaǵidattary men tásilderi, satyp alýǵa qatysýǵa bailanysty shekteýler, satyp alýdy josparlaý qaǵidalary jáne áleýetti ónim berýshilerge qoiylatyn biliktilik talaptary aiqyndalady.
«Osy jáne basqa da zań jobalary boiynsha Nur Otan, Qazaqstannyń Halyq partiiasy jáne «Aq jol» partiialarynyń parlamenttik fraktsiialary, sondai-aq Qazaqstan halqy Assambleiasynyń depýtattyq toby jemisti eńbek etti. Osy jolda kóptegen usynystary zań jobalaý jumysynda kórinis tapqan «Aýyl», «Adal» partiialary men Jalpyulttyq sotsial-demokratiialyq partiiasynyń belsendi ustanymdaryn atap ótkim keledi», - dedi Májilis tóraǵasy.
Nurlan Nyǵmatýlin atap ótkendei, qazirgi ýaqytta Májilis qorjynynda 41 zań jobasy bar. Olar: básekelestikti damytý, kásipkerlik qyzmet salasynda jańa retteýshilik saiasatty engizý, biýdjettik zańnamany jetildirý, bala quqyqtaryn qorǵaý, volonterlik qyzmet, qaiyrymdylyq, memlekettik áleýmettik tapsyrys jáne úkimettik emes uiymdarǵa arnalǵan granttar týraly, sondai-aq, sybailas jemqorlyqqa qarsy is-qimyl máseleleri jáne taǵy basqalar.
Otyrys barysynda Májilis tóraǵasy saiasi partiialardyń Palataǵa engiziletin zań jobalary boiynsha tujyrymdamalyq usynystaryn keńes otyrysynda talqylaýdy usyndy.
