Búgin Májilis Spikeri Nurlan Nyǵmatýlinniń tóraǵalyǵymen ótken jalpy otyrysta depýtattar altynshy sessiiaǵa arnalǵan negizgi parlamenttik is-sharalar josparyn bekitti, dep habarlaidy "Ult aqparat".
Májilis Tóraǵasy Nurlan Nyǵmatýlin atap ótkendei, aǵymdaǵy sessiia jumysy aýqymdy bolady dep kútilýde.
Komitetterdiń keńeitilgen taqyryptyq otyrystarynda, dóńgelek ústelderinde qoǵamnyń ózekti máseleleri qaralady. Olardyń qatarynda ekologiia, agroónerkásiptik keshen, ǵylym, halyqqa qyzmet kórsetýdi jetildirý jáne t.b máseleler bar.
Aldyńǵy sessiiadaǵydai «Úkimet saǵattary» ministrdiń jalpy saladaǵy ahýal týraly emes, naqty bir memlekettik baǵdarlamanyń oryndalýy týraly esebimen jańartylǵan nysanda ótkiziletin bolady.
Azamattarǵa quqyqtyq kómek kórsetýge boiynsha da parlamenttik tyńdaýlar josparlanǵan.
Barlyq is-sharalar sanitarlyq-epidemiologiialyq talaptardy saqtai otyryp uiymdastyrylady.
Májilis Tóraǵasy depýtattardyń jumys aýqymy, eń aldymen Memleket Basshysy Joldaýyndaǵy mindetterdi zańnamalyq júzege asyrýǵa baǵyttalatynyn jetkizdi.
«Ózderińiz kórip otyrǵandai, eldegi qalyptasqan jaǵdaiǵa qaramastan biz osy sessiiada ádettegidei kóptegen is-sharalar josparlap otyrmyz. Onyń ishinde, Úkimet saǵattary, parlamenttik tyńdaýlar, ártúrli kezdesýler jáne otyrystar da bar. Olardyń barlyǵynda eń aldymen, ekonomikalyq-áleýmettik mańyzdy suraqtar talqylanatyn bolady. Árine, is-sharalardy uiymdastyrý, ótkizý formatynda ózgerister bolsa da, ol jumys sapasyna eshqandai áser etpeidi. Ol jaǵynan ótken sessiiadan da tájiribemiz bar»,– dedi Májilis Tóraǵasy.
Nurlan Nyǵmatýlin sonymen birge depýtattar jumysynyń ashyqtyǵyna jáne barlyq aqparattyq múmkindikterdi paidalaný qajettigine basa nazar aýdardy.
