Májilis Tóraǵasy Nurlan Nyǵmatýlin Búkilqytailyq halyq ókilderi jinalysy Turaqty komitetiniń Tóraǵasy Li Chjanshýmen beinekonferentsiia bailanysy arqyly kezdesý ótkizdi, dep habarlaidy "Ult aqparat".
Palata Spikeri Qytai Halyq Respýblikasy Qazaqstannyń mańyzdy strategiialyq áriptesi, dos jáne tatý kórshisi ekenin atap ótip, eki el arasynda diplomatiialyq qatynastar ornaǵan 29 jyl ishinde senimdi saiasi dialog, tereń ekonomikalyq bailanystar ornap, jan-jaqty yntymaqtastyqtyń belsendi damyǵanyna nazar aýdardy.
Kezdesý barysynda Nurlan Nyǵmatýlin osynyń barlyǵy qos memleket kóshbasshylarynyń dostyǵy men senimdi qarym-qatynasynyń arqasynda qol jetkizgen jetistikter ekenine toqtalyp, odan ári Qazaqstannyń Tuńǵysh Prezidenti Nursultan Nazarbaevtyń memleketaralyq qatynastardyń strategiialyq áriptestik deńgeiine jetkizý jolyndaǵy mańyzdy rólin atap ótti. Sondai-aq, Májilis Tóraǵasy Qazaqstannyń qazirgi prezidenti Qasym-Jomart Toqaevtyń Qytaimen yntymaqtastyqqa úlken mán beretinin aitty.
Óz kezeginde, mártebeli meiman Qazaqstannyń jaqyn da shynaiy dos memleket ekenin, sondai-aq, elder arasyndaǵy joǵary diplomatiialyq jáne yntymaqtastyq bailanysqa kóńil bóldi. Sonymen qatar, Li Chjanshý ótken jyl elder úshin kúrdeli kezeń bolǵanyn atap ótip, indet ýaqytynda Qytai men Qazaqstan arasynda koronavirýsqa qarsy ózara qoldaý belsendi júrgizilgenin aitty.
Búkilqytailyq halyq ókilderi jinalysy Turaqty komitetiniń Tóraǵasy Qazaqstannyń gúldenýine niettes bola otyryp, memleket basshylarynyń eldi damytý jolyndaǵy airyqsha eńbekterine toqtaldy. Sondai-aq, alda qoiǵan mindetter men josparlardyń sátti oryndalyp, Qazaqstannyń tabysty 30 memleket qataryna qosylatyna senim bildirdi.
Kezdesý barysynda Májilis Tóraǵasy karantindik sharalarǵa qatysty Qazaqstan-Qytai shekarasyndaǵy ótkizý beketter arqyly júkterdi tasymaldaýda qiyndyq oryn alǵanyna bailanysty avtokólik jáne temirjol qatynastarynyń úzdiksiz jumysyn qalpyna keltirý úshin Qytaidyń ótkizý beketterinde, «ekspress-dálizder», «jasyl dálizder» jáne júk tasymalyn ulǵaitý úshin «temir kerýen» qurý jónindegi bastamany iske asyrýdy jalǵastyrýǵa elimizdiń daiyn ekenin jetkizdi.
Nurlan Nyǵmatýlinniń pikirinshe, bul pandemiia jaǵdaiynda Eýraziia qurlyǵyndaǵy «Qytai-Eýropa» baǵyty boiynsha temirjol qatynasyn odan ári damytý jolymen óńirlik ekonomikalyq integratsiia sheńberinde Qazaqstan-Qytai yntymaqtastyǵyn nyǵaitýǵa múmkindik beredi.
Sonymen qatar, Májilis Tóraǵasy kezdesýdiń Qytai Kommýnistik partiiasynyń 100 jyldyǵy qarsańyna sáikes kelgenin alǵa tartyp, dostas Qytai eline órkeniet pen baq-bereke tiledi.
