Búgin Májilis Spikeri Nurlan Nyǵmatýlinniń tóraǵalyǵymen ótken jalpy otyrysta depýtattar «Kvazimemlekettik sektordyń jekelegen sýbektileriniń satyp alýy týraly» zań jobasyn birinshi oqylymda maquldady, dep habarlaidy "Ult aqparat".
Nurlan Nyǵmatýlin atalǵan zań jobasy elimizdiń ekonomikasy úshin erekshe mańyzdy ekenin aita kele: «Elbasymyz Nursultan Ábishuly Nazarbaev óz bastamasymen «Samuryq-Qazyna» Ulttyq qoryn qurǵan kezde, osyndai kvazimemlekettik sýbektiler jumysynyń ashyq jáne tiimdi bolýyna basa nazar aýdarǵan bolatyn. Memleket Basshysy Qasym-Jomart Kemeluly Toqaev ta óziniń Joldaýynda kvazimemlekettik satyp alýlar máselesine kóńil bólip, arnaiy zań daiyndaý týraly tapsyrma berdi. Osyǵan orai, kvazimemlekettik sektordyń ashyq jáne básekege qabiletin arttyratyn jańa zań jobasy ázirlendi Bul zań jobasyna qatysty birqatar otyrystar, birqatar talqylaýlar ótti. Kóptegen usynystar, túzetýler de engizildi», - dedi.
Májilis Tóraǵasynyń pikirinshe, endi osy saladaǵy barlyq satyp alýlar boiynsha baqylaý jasalady. Sonymen birge, otandyq ónimderimizdi qoldaýǵa jol ashylady.
Nurlan Nyǵmatýlinniń aitýynsha, zań qabyldanǵannan keiin jaǵdai ózgerýi tiis. Óitkeni, onyń normalary «Samuryq-Qazyna» qorynyń, «Báiterek», «QazAgro» holdingteriniń ǵana emes, sondai-aq satyp alýdyń jalpy somasy jyl saiyn shamamen 3,5 trillion teńgeni quraityn 253 ulttyq kompaniia men olardyń enshiles uiymdarynyń qyzmetin retteitin bolady. Bul qazirgi elimizdiń ekonomikalyq belsendiligi qalpyna kele bastaǵan ýaqytta erekshe mańyzdy.
Palata Spikeri atap ótkendei, kvazimemlekettik sektordaǵy satyp alýlardyń ashyqtyǵy men tiimdiligin arttyratyn zań jobasy satyp alýlar úshin básekelik jaǵdailar jasaýǵa, sondai-aq, otandyq óndirýshilerdi qoldaýǵa baǵyttalǵan.
Sonymen qatar, zań jobasy qazaqstandyq kásiporyndardyń óndiristik qýatyn barynsha arttyryp, jumys oryndaryn saqtap ǵana qoimai, jańa jumys oryndaryn qurýǵa múmkindik beredi.
Aita ketý kerek, zań jobasy kvazimemlekettik sektor, «Atameken» Ulttyq kásipkerler palatasy, saraptama uiymdary jáne qoǵamdyq birlestikter ókilderiniń qatysýymen jan-jaqty talqylanyp, qaraldy.
