Búgin Parlament Májilisiniń jalpy otyrysynda depýtattar «2021-2023 jyldarǵa arnalǵan respýblikalyq biýdjet týraly» zańnamalyq túzetýlerdi maquldady, dep habarlaidy "Ult aqparat" Májilistiń baspasóz qyzmetine silteme jasap.
Otyrys barysynda depýtattar biýdjetke qatysty birqatar ózekti suraqtardy kóterdi.
Atap aitqanda, sapasy syn kótermeitin jol qurylysyna, onyń ýaqytyly aiaqtalýyna qatysty máselelerge erekshe mán berdi.
Osy rette Nurlan Nyǵmatýlin: «Jasyratyny joq, bárimiz qar túsip ketse de, jol jóndep jatqanyn jii kórip júrmiz. Keide bir jyl ótpei qaitadan jóndep jatqanyn da kóremiz. Bul neniń kórsetkishi? Birinshiden, sapaly konkýrs ótkizý úshin, sapaly kompaniia tabý úshin ýaqyt jetispeidi. Ekinshiden, barlyq jumystar asyǵys jasalady. Árine, odan keiin eshqandai sapasy da bolmaidy. Al, biýdjetten qansha aqsha ketip jatyr. Ótken aida ol týraly Prezident te aitty. Qazir de taǵy 140 mlrd. bereiin dep otyrmyz», - dedi.
Sonymen qatar, Palata spikeri Indýstriia jáne infraqurylymdyq damý ministrine osynsha qarajat bólgennen keiin, nátije, iaǵni, sapaly joldar bolý kerektigin aitty.
Respýblikalyq biýdjet týraly zańnamalyq túzetýler boiynsha qorytyndy jasaǵan Nurlan Nyǵmatýlin biýdjet – elimizdiń turaqty damýyn, halqymyzdyń áleýmettik jaǵdaiyn qamtamasyz etýdiń kepili ekenin alǵa tartyp, bul qujat árqashanda Májilis qaraýyndaǵy eń mańyzdy, eń jaýapty zań jobalardyń biri ekenin aitty.
Búgingi biýdjette ádettegidei áleýmettik qoldaýǵa, densaýlyqqa, bilim, eńbekpen qamtý salalaryna jáne jol qurylysy, taǵy basqa da mańyzdy baǵyttardy júzege asyrýǵa qosymsha qarajattar qaraldy. Osynyń barlyǵy, Elbasy Nursultan Ábishuly Nazarbaevtyń strategiialyq bastamalaryn, Memleket Basshysy Qasym-Jomart Kemeluly Toqaevtyń sessiianyń ashylýynda bergen tapsyrmalaryn júzege asyrýǵa yqpal etedi. Endigi mindet – osy bólingen qarajatty alǵa qoiǵan maqsattarǵa tiimdi paidalaný. Árine, bul suraqtar Májilis depýtattarynyń da baqylaýynda bolady, - dedi.
Aita ketý kerek, atalǵan zań jobasy 2021-2025 jyldarǵa arnalǵan makroekonomikalyq kórsetkishter boljamynyń naqtylanýyna bailanysty ázirlenip, «Nur Otan» partiiasynyń sailaýaldy baǵdarlamasyna, Memleket basshysynyń Joldaýyna jáne koronavirýs infektsiiasymen kúres jónindegi is-sharalardy iske asyrýǵa baǵyttalǵan.
