Búgin Palata spikeri Nurlan Nyǵmatýlinniń tóraǵalyǵymen ótken Májilistiń jalpy otyrysynda «Qazaqstan Respýblikasynyń keibir zańnamalyq aktilerine turǵyn úi baǵdarlamalary operatorlarynyń sanyn qysqartý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy "Ult aqparat".
«Turǵyn-úi saiasaty árqashanda kún tártibinen túspeitin mańyzdy másele ekeni barshańyzǵa belgili. Osy jolda Memleket basshysynyń tapsyrmasymen ázirlenip, maquldanǵan búgingi Zań jobasy atalǵan saladaǵy suraqtardy ýaqyt talabyna sáikes, odan ári, tiimdi sheshýge yqpal etedi dep bilemiz. Sebebi, endi, Qazaqstanda turǵyn úi saiasatyn júzege asyratyn biryńǵai operator qurylady. Ol halqymyzǵa, sonyń ishinde, áleýmettik qoldaýdy qajet etetin azamattar arasynda qoljetimdi baspana máselesin sheshýge keń jol ashatyn bolady», - dedi Nurlan Nyǵmatýlin.
Zań jobasy turǵyn úi baǵdarlamalarynyń jumys istep turǵan operatorlary «Qazaqstan ipotekalyq kompaniiasy» AQ, «Báiterek development» AQ men «Turǵyn úi qurylysyna kepildik berý qory» AQ-ny Turǵyn úi qurylysynyń biryńǵai operatory etip biriktirýge, sondai-aq olardyń birin-biri qaitalaityn fýnktsiialaryn joiýǵa jáne jalpy ákimshilik shyǵystaryn qysqartýǵa baǵyttalǵan.
Nátijesinde, jalpy ákimshilik shyǵyndar 42% - ǵa azaiady.
Osy rette Májilis tóraǵasy negizgi basymdyqtar muǵalimderge, dárigerlerge, biýdjet uiymdarynyń qyzmetkerlerine, sondai-aq ortasha tabys deńgeii jáne ortashadan tómen memlekettik qyzmetshilerdi qamtitynyn atap ótti.
«Jalpy, biryńǵai operator qurý bizdiń azamattarymyz úshin turǵyn úidiń qoljetimdiligin qamtamasyz etýge baǵyttalǵan keshendi turǵyn úi saiasatyn qalyptastyrýǵa yqpal etedi», - dedi Nurlan Nyǵmatýlin.
Zań jobasynda Qazaqstan Respýblikasynyń 3 kodeksi men 4 zańyna ózgerister men tolyqtyrýlar engizý usynylady.
Sonymen qatar qujat jobasynda turǵyn úi qurylysy biryńǵai operatorynyń ipotekalyq turǵyn úi qaryzdaryna jáne kóppáterli turǵyn úidiń qurylysyn aiaqtaýǵa kepildikter berý, investitsiialyq jobalardy qarjylandyrý jáne iske asyrý jónindegi qyzmetin reglamentteý boiynsha da normalar kózdelgen.
