Májilis tóraǵasy Nurlan Nyǵmatýlin ulttyq ekonomika ministri Rýslan Dálenovke otandyq taýar óndirýshilerdi qoldaýdy tapsyrdy, dep jazady Sputnik agenttigi.
Búgin májilistiń jalpy otyrysynda "Bir taraptan EAEO men oǵan múshe memleketter jáne ekinshi taraptan Iran Islam Respýblikasy arasyndaǵy erkin saýda aimaǵyn qurýǵa alyp keletin ýaqytsha kelisimde ratifikatsiialaý týraly" zań jobasy qaraldy. Suraq-jaýap barysynda depýtat Arman Qojahmetov importtyq keden bajdaryn tómendetýge qatysty suraq qoidy.
"Kelisimge sáikes, EAEO tarapynan mazýt, motor maiy sekildi munai óńdeý ónimderi, sondai-aq, kókónis, onyń ishinde qyzanaq, kartop, qiiar, tátti ónimderi men birqatar ónerkásiptik taýarǵa baj mólsheri tómendetiledi. Biraq, bul taýarlar óz elimizde de óndiriletinin bilemiz. Osy oraida mende mynadai suraq týyndaidy: bajdyń tómendeýi qazaqstandyq taýar óndirýshilerdiń básekege qabilettiligine keris áser etpei me?", - dedi Qojahmetov.
Ulttyq ekonomika ministri Qazaqstan keibir taýarlardy importtaýǵa múddeli ekenin atap ótti.
"Kelisim júrgizgen kezde, taraptar barynsha kóp jeńildikke ie bolǵysy keledi. Iran tarapy bas kezinde myń taýar týraly másele kóterdi, kelissóz barysynda biz taýar sanyn 502-ge deiin qysqarttyq. Biz taýar importyna múddeli ekenimizdi atap ótkim keledi, ásirese tsitrýs, piste, alma sekildi azyq-túlik túrlerine", - dedi Dálenov.
Ol jemister men munai ónimderi, qubyrlar men armatýra boiynsha baj mólsheri sál ǵana tómendegenin atap ótti.
"Bul otandyq taýar óndirýshiler men básekelestikke esh áserin tigizbeidi. Onyń ústine Qazaqstan da Iranǵa eksporttaityn taýarlar boiynsha jeńildikter aldy. Bul bidai, arpa, et jáne taǵy basqa boiynsha. Atalǵan qazaqstandyq taýarlardyń áleýetti eksporty úsh jyl ishinde eki eselenip, shamamen 1 milliard dollarǵa jetedi", - dedi ministr.
Osy kezde sózge májilis tóraǵasy Nurlan Nyǵmatýlin aralasyp, ulttyq ekonomika ministrinen otandyq taýar óndirýshilerdi qoldaýdy surady.
"Rýslan Erbolatuly, suraq óte durys qoiyldy. Siz qyzmet kezinde bazardaǵy sýrettermen júretinińizge qaraǵanda, bazar aralaityn siiaqtysyz. Munyń ózi jaqsy. Qazaqstandyq taýar óndirýshilerdiń, eń aldymen, aýyl sharýashylyǵy taýarlaryn óndirýshilerdiń básekege qabilettiligi qorǵalmasa da, tym bolmasa úkimettiń qoldaýyn sezinýi kerek", - dedi spiker.
Dálenov bul máseleni baqylaýǵa alatynyna sendirdi.
