"M-Tehservis" munai servistik kompaniiasynyń jumysshylary jalaqyny 65%-ke kóterýdi talap etken. Bul týraly búgin eńbek jáne halyqty áleýmettik qorǵaý ministri Birjan Nurymbetov aitty, dep habarlaidy Sputnik Qazaqstan.
"Jumysshylar bes-alty kún boiy jalaqyny 65 protsentke ósirýdi talap etip otyr. Bastapqyda kompaniia basshylyǵy ailyqty kóterýge kelisken edi. Tiisti hattama da toltyryldy. Alaida, ókinishke qarai, qol qoiylǵan joq. Qazir biz jergilikti eńbek inspektsiiasymen, oblys ákimimen birlesip osy máselemen ainalysyp jatyrmyz", - dedi Nurymbetov úkimet kýlýarynda.
Ministr "M-Tehservis" jumysshylarynyń jalaqysy qansha degen suraqqa jaýap berýge qinaldy.
"Qazir sizderge naqty aita almaimyn. Menińshe, shamamen 275 myń teńge. 200 jumysshynyń óz jalaqysyna kóńili tolmaidy", - dedi ol.
Onyń aitýynsha, "M-Tehservis" kompaniiasynyń bas keńsesi Almatyda ornalasqan. Qazir basshylyqpen kelissózder júrip jatyr. Qyzmetkerler jumys ornyna oralǵan, alaida jumys berýshiler men jumysshylar arasynda daý-janjal jalǵasyp jatyr.
"M-Tehservis" JShS jumysshylary ótken aptada ereýilge shyqty. Narazylyq aktsiiasy 5 qyrkúiekte Bozashy jáne Jetibai munai ken oryndarynda bolǵan. Barlyq tsehtyń jumysshylary sol kúni jumysqa shyqpai qaldy. Olar basshylyqtan jalaqyny kóterýdi talap etken.
