Eńbek jáne halyqty áleýmettik qorǵaý ministri Birjan Nurymbetov kez kelgen ǵimarattyń qurylysyn bastarda eń aldymen onyń múgedek jandarǵa jailylyǵyn eskerý kerektigin aityp ótti, dep habarlaidy QazAqparat tilshisi.
«Múmkindigi shekteýli jandarǵa bizdiń elimizde birshama jaǵdai jasalyp jatyr. Járdemaqysy tólenip, basqa da sharalar qolǵa alynyp jatqanymen, bul jetkiliksiz. Mysaly, 2025 jylǵa deiingi Ulttyq jospardyń qabyldanǵanynan habardar shyǵarsyzdar. Sonyń jeti baǵyty bar. Eń bastysy, múmkindigi shekteýli jandarǵa qoljetimdi ortany qalyptastyrý kerek. Qazir biz bir múgedek janǵa jumys taýyp berip jatsaq, álgi adam ǵimaratqa kire almai qiyndyqqa tap bolady. Ǵimarattyń bárinde lift joq. Sondyqtan, bul jerde jumys berýshiniń de jaýapkershiligi bar», - dedi Birjan Nurymbetov «Nur Otan» partiiasynyń respýblikalyq qoǵamdyq qabyldaýyna kelgen «Miras» qorynyń prezidenti Júzbai Serikulymen kezdesý barysynda.
Onyń aitýynsha, áleýmettik sala qyzmetkerleri múgedek jandarǵa kez kelgen ǵimaratqa ońai kire alýyn teksergen. Nátijesinde birshama jumys berýshige aiyppul da salynǵan.
«Áitse de, másele aiyppul salýmen sheshilmeidi. Eń aldymen, qoǵamnyń pikirin ózgertý kerek. Kez kelgen qurylysty bastaǵan kezde osy talaptar birinshi kezekte qoiylýy kerek. Múgedekter arbasymen keletinder, zaǵip jandar bar. Baǵdarsham men jaiaý júrginshiler jolynda da olarǵa tiisti jaǵdai jasalýy tiis. Josparǵa sáikes, sonyń bárin retke keltirý máselesi boiynsha jumys júrgizemiz. 2019 jylǵa osy baǵytta 18 mlrd teńge qarajat bólindi. Sondyqtan, bul problemanyń baryn bilemin», - dedi Birjan Nurymbetov.
Aita ketsek, Eńbek jáne halyqty áleýmettik qorǵaý ministrimen búgingi kezdesý barysynda «Miras» qorynyń prezidenti Júzbai Serikuly Zaǵiptar úiiniń jobasyn tanystyrǵan bolatyn.
