Almaty oblysy Qarasai aýdandyq sotynda akter Nursultan Jaqsygenge qatysty qylmystyq is qarala bastady. Oǵan Qylmystyq kodekstiń 274-baby 2-bóliginiń 3-tarmaǵy, iaǵni onlain-platformalardy paidalana otyryp kórineý jalǵan aqparat taratty degen aiyp taǵylyp otyr, dep habarlaidy ult.kz.
Eger akterdiń kinási sotta dáleldense, oǵan 3 myń AEK-ke deiin, iaǵni 12,975 million teńgege deiin aiyppul salynýy múmkin. Sonymen qatar 800 saǵatqa deiin qoǵamdyq jumysqa tartý, úsh jylǵa deiin bas bostandyǵynan aiyrý nemese osy merzimge bas bostandyǵyn shekteý jazasy qarastyrylǵan.
Qazir Nursultan Jaqsygen úiqamaqta otyr. Buǵan deiingi sot otyrysynda onyń advokaty bultartpaý sharasyn úiqamaqtan eshqaida ketpeý týraly qolhatqa aýystyrýdy suraǵan. Alaida sýdia qorǵaý tarapynyń ótinishin qanaǵattandyrmaǵan.
Is akterdiń burynǵy jubaiy Fariza Sabyralievamen arasyndaǵy daýǵa bailanysty qozǵalǵan. Buǵan deiin Sabyralieva áleýmettik jelide ózi týraly shyndyqqa janaspaityn ári abyroiyna nuqsan keltiretin aqparat taratylǵanyn málimdegen.
Onyń aitýynsha, qylmystyq is aiasynda Nursultan Jaqsygen odan keshirim suraǵan. Alaida burynǵy jubaiy keshirimdi qabyldamai, isti sotqa jetkizgen.
Aita keteiik, Nursultan Jaqsygen Rýslan Ótepbaiǵa pikir bildirip, eks-jubaiyna bylapyt sózderdi onyń atynan basqa bireýler jazǵanyn aitqan.
