Búgin Elbasy Nursultan Nazarbaev Batys Qazaqtan oblysyna jumys sapary barysynda jańa alańda jurtshylyqpen jáne oqýshylar saraiynda jastarmen kezdesti, dep habarlaidy QazAqparat tilshisi.
Prezident oqýshylar saraiynda aldymen balǵyn boksshylarmen emen-jarqyn áńgimelesti. Jas bylǵary qolǵap sheberleri bolashaqta osy Batys Qazaqstan oblysynan shyqqan Rio Olimpiadasynyń chempiony Daniiar Eleýsinov siiaqty álemdik jarystarda top jarýǵa ýáde berdi.
Memleket basshysyna óńirde densaýlyq saqtaý jáne bilim berý salasynda júzege asyrylyp jatqan tsifrlandyrý jobalary tanystyryldy. Elbasy bul jóninen Batys Qazaqstan oblysynyń alda ekendigin, osy baǵyttaǵy jumystardy jalǵastyrý kerektigin atap ótti.
Nursultan Nazarbaev bir top jańashyl jastarmen kezdesti. «AQJAYIQ» telearnasynyń redaktory Nina Pavlycheva qazaq tilinde «100 jańa oqýlyq» jobasy boiynsha jaryq kórgen «Media etika» kitabyn oqyp, kókeige túigendigin aitsa, 1991 jyly Prezident esimin qoiǵan Nursultan Saqpaev ushqysh bolýdy bala kezden armandaǵanyn, qazir sonyń oryndalyp jatqanyn jetkizdi. Sol sekildi M.Ótemisov atyndaǵy Batys Qazaqstan memlekettik ýniversitetiniń stýdenti Zarina Yqsanova «Prezidenttiń áleýmettik bes tapsyrmasy» aiasynda oblysta jańadan jataqhanalar salynyp jatqany jastar úshin úlken qýanysh ekendigin málim etti. Jas kásipker Ashat Ramazanov óziniń jańa jobalarymen tanystyrdy.
Elbasy jastarǵa qazirgi ýaqytta memleket tarapynan mol múmkindikter jasalyp otyrǵanyn aityp, olarǵa jańashyldyq jolynda tabys tiledi. Osymen Prezidenttiń Batys Qazaqstan oblysyndaǵy sapary aiaqtaldy.
