Prezident Nursultan Nazarbaev otandyq BAQ ókilderimen kezdesýde Shymkentten keiin kelesi kezekte qai qalalardyń «milliondyq» áleýetiniń baryn aityp, Túrkistannyń túleýi týraly oiymen bólisti, dep habarlaidy QazAqparat tilshisi.
«Bizge million adam turatyn qalalar kerek. Million turǵyny bar qalada - ǵylym da, mádeniet te, bilim de damidy. Búkil álemde solai. Keleshekte álemde iri 600 qala - megapolis bolady da, negizgi báseke solardyń arasynda órbidi dep aitylyp jatyr. Adamdar sondai qalalarda ómir súrgisi keletin bolady. Sondai qalalardy kóbeitý kerek. Táýelsizdik alǵaly beri sondai million turǵyny bar úsh qalamyz bar. Endigi bolsyn degen oiym - Aqtóbe, múmkin Qaraǵandy. Ýrbanizatsiia báribir júrip jatyr», - dedi Nursultan Nazarbaev.
Prezidenttiń aitýynsha, AQSh-ta halyqtyń tek 2 paiyzy ǵana aýylda turady.
«Ondaǵy aýyl halqy ózin asyramaq túgili, aýyl sharýashylyǵy ónimderin eksporttap jatyr. Al bizde aýylda halyqtyń 43 paiyzy turady. Sondyqtan, bul másele el úshin de saiasat pen tarih úshin de óte úlken másele dep sanaimyn. Túrkistandy kótersek, az jyldyń ishinde 300 myń halqy bar shahar bolyp shyǵady. Men onyń qurylysyn bekittim. Eń birinshiden, ákimdiktiń ortalyǵy, barlyq departamentter, úidiń qurylysy, mádeni nysandar turǵyzylǵannan keiin birneshe mýzeiin, mysaly Qazaq handyǵynyń tarihy, Túrki dúniesiniń tarihy degendei salý kózdelýde», - dedi Elbasy.
Prezidenttiń aitýynsha, Túrkistanda Qazaqstannyń tarihi jádigerleri jinaqtalyp, áýejai men temir jol vokzaly jóndelse, qala budan da beter dami túsetinin aitty.
«Qazir sol arqyly «Batys Qytai-Batys Eýropa» degen dál ortasynan dáliz júrip jatyr. Jol bar. Sonda órkendep-ósip, týristerdi tartyp, aqyry Túrkistan úlken qala bolyp shyqsa degen arman bar. Jyly jaqty jaqsy kórgender sol jaqqa baryp tursyn. Sergek bolamyn degender osynda (Astanaǵa) kelsin (kúldi)», - dep sózin aiaqtady Nursultan Nazarbaev.
