Qazaqstannyń Tuńǵysh Prezidenti - Elbasy Nursultan Nazarbaev Japoniianyń imperatory Narýhitonyń taqqa otyrýyna arnalǵan resmi sharaǵa qatysý úshin Tokioǵa ushyp keldi, dep habarlaidy "Ult aqparat".
«Imperator Akihitonyń óz erkimen ókilettigin toqtatýy osydan eki ǵasyr ýaqyttan keiingi airyqsha oqiǵa bolyp otyr. Sol sebepti, 2017 jyly ol óz ókilettigin toqtatýy úshin arnaiy zań ázirlenip, qabyldanǵan edi. Jalpy osy ýaqytqa deiingi qabyldanǵan Imperator úii týraly zańda imperatordyń óz erkimen ókilettigin doǵaratyndyǵy jazylmaǵan. Sondyqtan bul shara - Imperatordyń taqqa otyrý saltanatty rásimi japon halqy úshin qasietti sanalady», - dedi Qazaqstannyń Japoniiadaǵy Tótenshe jáne Ókiletti Elshisi Erlan Baýdarbek-Qojabaev qazaqstandyq BAQ ókilderine bergen suhbatynda.
Qazaqstan Elshisiniń dereginshe, qazirgi ýaqytta 177 eldiń delegatsiiasy Japoniianyń imperatory Narýhitonyń taqqa otyrýyna arnalǵan resmi sharaǵa qatysatyndyǵyn rastaǵan. Olardyń qatarynda Memleket jáne Úkimetter basshylary, syrtqy ister ministrleri bar.
«Japon Úkimeti, onyń ishinde Úkimet basshysy Sindzo Abe Nursultan Ábishuly Nazarbaevtyń osy jolǵy saparyna zor rizashylyq tanytyp, óz qurmetin bildirip otyr. Sebebi, osyǵan deiin aitqanymdai, japon halqy úshin imperatordyń taqqa otyrýy qasietti mánge ie», - dedi Qazaqstan Elshisi.
Esterińizge sala keteiik, Japoniia Úkimeti 2019 jyldyń 1 mamyrynda jańa imperiialyq kezeńniń bastalǵanyn jariialady. Bul kezeń «Reiv» dáýiri dep atalady. Qazaq tiline aýdarǵanda - «tártip», «úilesim» jáne «gúldengen álem» degen maǵyna beredi. Qazirgi «Heisei» dep atalatyn dáýirdiń ataýy Qytai ádebietinen alynǵan bolatyn. Maǵynasy - «álem jetistigi». Ol dáýir 1989 jyldyń qańtarynda, Hirohito imperator qaitys bolǵan kezde bastalǵan edi. Onyń uly Akihito Japoniianyń 125-shi imperatory retinde 30 jylǵa jýyq ýaqyt bilik qurdy. Sóitip, óz erkimen taqtan bas tartty. Ol bul sheshimin jasynyń ulǵaiǵanymen túsindirdi. Hanzada Narýhito taqqa 1 mamyr kúni otyrdy.
