Elbasy Nursultan Nazarbaev Úkimettiń keńeitilgen otyrysynyń qorytyndysy boiynsha sóz sóiledi. Ult portaly málimdemeniń tolyq mátinin nazarlaryńyzǵa usynady.
Memleket basshysynyń Úkimettiń keńeitilgen otyrysynyń qorytyndysyna jáne kadrlyq ózgeristerge qatysty málimdemesi
Búgin Úkimettiń keńeitilgen óte mańyzdy jiyny ótti. Oǵan ákimder de qatysty. Úkimet músheleriniń sózinde de, meniń qorytyndy sózimde de 2016 jyldyń qorytyndysy jasalyp, barlyq jaǵdai egjei-tegjeili talqylandy.
Jyldyń basynan beri jasalyp jatqan sharýalar barshaǵa belgili.
Eki úlken másele bar. Birinshisi – saiasi reformalar: Konstitýtsiiaǵa ózgerister engizý. Ekinshisi – «Qazaqstannyń úshinshi jańǵyrýy» atty joldaý.
Osyǵan bailanysty habardar eteiin degenim – kadr máselesi boiynsha biraz ózgerister jasadyq.
«Báiterek» ujymynda jasalǵan tekseris qorytyndysy boiynsha Ulttyq ekonomika ministri Bishimbaev qyzmetten bosatyldy. Onyń ornyna Timýr Súleimenov ministr bolyp taǵaiyndaldy. Ol – saýatty, tájiribesi mol azamat, Máskeýde jumys istep keldi. Aldynda sol ministrlikte orynbasar bolǵan. Daiyndyǵy jaqsy dep, oǵan senim artamyz.
Ekinshiden, eki ministrlikti bólip, Densaýlyq saqtaý ministrligin jeke qurǵan sebebimiz – bul saladaǵy saqtandyrý máselesine bailanysty kóp jumys bar. Halyqqa sony túsindirip, iske asyrý kerek. Sebebi, bul – halyqqa jáne densaýlyq saqtaý júiesine óte qajet másele. Amerikada oqyp kelip, Nazarbaev Ýniversitetinde jumys istegen Eljan Birtanov ministr qyzmetine taǵaiyndaldy. Ol sol ministrlikte orynbasar bolǵan. Jumysty atqara alady dep senemin.
Úshinshiden, Qazaqstannyń Reseidegi elshisin taǵaiyndadym. Ol – Imanǵali Tasmaǵambetov. Birinshiden, Resei – biz úshin kórshi ári áriptes, ekonomika men saiasi turǵydan óte jaqyn memleket. Ol jerge óte bedeldi, tájiribeli, salmaqty, Qazaqstan men Resei arasyndaǵy jaǵdaidy biletin tulǵa qajet bolǵannan keiin osyndai sheshim qabyldadym. Ekinshiden, Tasmaǵambetovtiń qalaýy solai boldy. Oiy men tilegin eskerip, eki jaǵynan da sai keletin bolǵandyqtan, ony sol qyzmetke taǵaiyndadym.
Premer-Ministr orynbasarlarynyń az bolǵany jón, ministrler óz sharýasyn atqarýy kerek. Eshkimge siltemei, eshkimge súienbei, bergen máseleni sheship, ózderi jaýap berýi kerek. Mine, men osy máseleler jóninde aitaiyn degen edim.
