Qazaqstannyń Tuńǵysh Prezidenti Nursultan Nazarbaev Ózbekstan Respýblikasynyń Prezidenti Shavkat Mirzieevpen telefon arqyly sóilesti, dep habarlaidy "Ult aqparat" Elbasynyń resmi saityna silteme jasap.
Nursultan Nazarbaev Shavkat Mirzieevti týǵan kúnimen quttyqtap, zor densaýlyq jáne memlekettik qyzmetine tolaǵai tabys, al baýyrlas Ózbekstan halqyna baq-bereke tiledi.
Taraptar sońǵy jyldary qol jetkizilgen ýaǵdalastyqtardyń arqasynda Qazaqstan-Ózbekstan arasyndaǵy kópqyrly yntymaqtastyq tyń serpin alyp, jańa sapaly deńgeige kóterilgenin atap ótti.
Ózara saýda kóleminiń artýymen jáne ekonomikalyq qatynastardyń nyǵaiýymen qatar mádeni-gýmanitarlyq bailanystardyń belsendi damyp kele jatqanyna nazar aýdaryldy. Atap aitqanda, 2018 jyly Qazaqstandaǵy Ózbekstan jyly tabysty ótti, biyl Ózbekstandaǵy Qazaqstan jyly aiasynda is-sharalar ótkizilýde.
Nursultan Nazarbaev pen Shavkat Mirzieev kún tártibindegi óńirlik máselelerdi de talqylady.
Taraptar tatý kórshilik rýhynda jáne eki el halqynyń igiligi jolynda damyp kele jatqan Qazaqstan-Ózbekstan strategiialyq qatynastary odan ári nyǵaia túsetinine senim bildirdi.
