«Bastaý biznes» jobasyna qatysýshylar 1,5 trln teńge salyq bóledi. Bul týraly atalǵan jobanyń 5 jyldyǵyna arnalǵan forýmǵa qatysýshylarǵa beineúndeý joldaǵan QR Tuńǵysh Prezidenti - Elbasy Nursultan Nazarbaev aitty, dep habarlaidy QazAqparat.
«Biyl «Atameken» ulttyq kásipkerlik palatasynyń «Bastaý biznes» jobasy 5 jyldyǵyn atap ótedi. Osy ýaqyttyń ishinde biznes negizderin 150 myńnan astam qazaqstandyq oqydy. Árbir úshinshi túlek óz isin ashty. Búkil Qazaqstan boiynsha 44 myńnan astam biznes-joba ázirlendi. «Bastaý biznes» túlekteri 60 myń jańa jumys ornyn ashty jáne shamamen 1,5 trln teńge salyq tólendi. Jobanyń tanymaldyǵy biznes negizderin oqý tájiribege basymdyq berý jáne tegin bolýynda ǵana emes. Oqý bitirgennen keiin túlekke «Eńbek» baǵdarlamasy aiasynda jeńildetilgen shaǵyn nesieniń nemese granttyq qarjylandyrýdyń qoljetimdi bolýy da mańyzdy mánge ie», - dedi Nursultan Nazarbaev beineúndeý barysynda.
QR Tuńǵysh Prezidenti «Bastaý biznes» jobasyn bitirýshige biznes-trener bir jyl boiy kásipkerdiń jobalaryna qoldaý kórsetetindigin atap ótti. Isin jańa bastaǵan kásipker týyndaǵan problemalar jalǵyz qalmaityndyǵyna da nazar aýdartty.
«Bul, ásirese búginde búkil biznes biz bastan keshirip otyrǵan jahandyq pandemiia saldarynan qatty qysym kórip otyrǵan jaǵdaida óte mańyzdy. Bul jaǵdaida ekonomikalyq ekiushtylyqty eńserý jáne sol arqyly Qazaqstannyń búkil ekonomikasy men halyqtyń jumyspen qamtylýyna memlekettik qoldaý is-sharalary kómek kórsetedi. Sarapshylardyń baǵalaýynsha, ótken jyl 20 ǵasyrdyń 30 jyldaryndaǵy uly kúizelis ýaqytynan da kúrdeli bolǵanyna qaramastan biz aýqymdy shyǵynnan jaltara aldyq. COVID-19 pandemiiasy men syrtqy ekonomikalyq jaǵdaidyń nasharlaýyna jaýap retindegi Qazaqstannyń is-qimyly batyl ári der ýaqytynda boldy. Qazaqstan Táýelsizdiginiń 30 jyly ishinde kóptegen synaq pen qiyndyqty bastan keshirdi. Biraq, kez kelgen daǵdarystan biz syn-tegeýirin ǵana emes, sonymen birge múmkindikterdi de kóre aldyq. Jáne de barlyq ýaqytta da damýymyzdyń basty qozǵaýshy kúshi búkil eldiń tabysy men óziniń jeke jeńisi arasynda teńdik belgisin qoia bilgen adamdar boldy. Eldiń gúldenýi onyń azamattarynyń ál-aýqatymen tikelei bailanysty. Sondyqtan ózim joǵary baǵalaityn «Bastaý biznes» baǵdarlamasynyń barlyq qatysýshylaryna shynaiy túrde tabys tileimin. Bul baǵdarlamany búkil elde jalǵastyrý qajet», - dedi Nursultan Nazarbaev.
