Qazaqstannyń Tuńǵysh Prezidenti «Samuryq-Qazyna» aktsionerlik qoǵamy basqarmasynyń tóraǵasy Ahmetjan Esimovti qabyldady, dep habarlaidy "Ult aqparat" Elbasynyń resmi saityna silteme jasap.
Kezdesý barysynda Nursultan Nazarbaevqa «Samuryq-Qazyna» aktsionerlik qoǵamynyń damýyndaǵy negizgi óndiristik jáne qarjylyq kórsetkishterge qol jetkizý úshin atqarylǵan jumystardyń nátijeleri týraly málimdeldi.
Atap aitqanda, usynylǵan esepke sáikes, birinshi jarty jyldyqtyń taza paidasy ótken jyldyń osy kezeńimen salystyrǵanda 50 paiyzǵa artyp, 749 milliard teńgeni qurady. Operatsiialyq paida jáne satýdan túsken kiris tiisinshe 492 milliard teńgeni jáne 3,3 trillion teńgeni qurady, bul 2018 jylǵy kórsetkishten 36 paiyzǵa jáne 12 paiyzǵa kóp.
Elbasy Qordyń oń damyp kele jatqanyna toqtalyp, qazaqstandyqtardyń ál-aýqatyn jaqsartýǵa baǵyttalǵan áleýmettik jobalardy iske asyrýǵa onyń belsendi atsalysýy qajet ekendigin atap ótti.
Qazaqstannyń Tuńǵysh Prezidenti «Qamqorlyq» bastamasy aiasynda múmkindigi shekteýli balalardy qoldaý máselesine nazar aýdardy.
– Memleket, ákimdikter, úkimettik emes uiymdar jáne biznes-qoǵamdastyqtar tarapynan erekshe qajettilikteri bar balalardy qoldaý úshin kóptegen jumys atqarylýda. Biraq, qazirgi tańda qyzmet kórsetip kele jatqan ońaltý ortalyqtary naqty qajettiliktiń teń jartysyn da qanaǵattandyra almaýda. Sondyqtan, osy baǵyttaǵy jumystardy kúsheitý qajet, – dedi Nursultan Nazarbaev.
Elbasy óńirlerde qoldanystaǵy infraqurylym negizinde kóp beiindi ońaltý ortalyqtaryn qurý, sondai-aq orta mektepterde inkliýzivti bilim berý isin qoldaý maqsatymen qosymsha resýrsty kabinetter ashý qajettigin atap ótti.
– «Samuryq-Qazyna» árdaiym qaiyrymdylyq jobalaryna qoldaý kórsetedi. Sondyqtan, holding osy bastamany da júzege asyrýǵa qatysa alady dep sanaimyn, – dedi Nursultan Nazarbaev.
Sonymen qatar, Qorǵa elimizdiń shalǵai óńirlerindegi az qamtylǵan otbasylarynan shyqqan daryndy balalardy qoldaý jáne damytý úshin bilim berý jobalaryn júzege asyrýdy bastaý tapsyryldy.
Sondai-aq, Elbasy meditsinalyq ortalyqtardyń materialdyq bazasyn jaqsartýǵa jáne salanyń kadrlyq áleýetin arttyrýǵa baǵyttalǵan meditsina salasyndaǵy jobalardy júzege asyrýdyń mańyzdylyǵyn atap ótti.
