Jaqyn kúnderi aýyldyq okrýgter, aýyldar men kentter ákimin tikelei sailaý bastalady. Mańyzdy saiasi oqiǵa qarsańynda saiasattanýshy, E. A. Bóketov atyndaǵy QarÝ «Saiasattaný jáne áleýmettaný» kafedrasynyń aǵa oqytýshysy Eldos Jumaǵulov pikir bildirdi, dep habarlaidy "Ult aqparat".
«Aýyl ákimderine úmitkerlerdi tirkeý aiaqtalyp, keshe 18.00 bastap úgit-nasihat jumysy bastalyp ketti.
Bul sailaýdyń orny bólek. Parlmentke nemese máslihatqa sailanatyn depýtattarǵa qaraǵanda aýyl ákimin sailaýdyń ózindik erekshelikteri bar. Depýtat pen ákim qyzmeti - jaýapkershiliktiń eki túrli deńgeii. Depýtat sailaýshy aldyndaǵy jaýapkershilikti ujymmen birge bólisse, aýyl ákiminiń jumysy turǵyndardyń kóz aldynda. Onyń barlyq jumysyna tikelei baǵa berýge bolady. Jol, sý men elektr jaryǵy jáne jaiylymynan qamtamasyz etýden bastap basqa da kóptegen aýyldyń kúibiń tirligin sheshý ákimniń sharýaǵa pysyq bolýyn talap etedi. Ol kabinette, jumsaq kresloda tynysh otyra almaidy. Halyq ony otyrǵyzbaidy da.
Ákimdikke úmitkerler ózin-ózi usynatyndarmen birge partiialar tarapynan da usynylatynyn bilemiz. 10 shildedegi málimetter boiynsha 730 orynǵa 2500 dei úmitker tirkelgen. Sonyń 1600 jýyǵy ózin-ózi usynǵandar, al 869 partiialar usynǵan.
Saiasi partiialardyń ishinde eń kóp úmitkerdi:
- «NurOtan» partiiasy usyndy – 586 adam,
- «Aýyl» - 104 adam,
- QHP -70 adam,
«ADAL» – 56 adam,
«Aqjol» - 53 adam.
Aita ketý kerek, JSDP partiiasy birde-bir úmitkerdi usynǵan joq. Bul málimetter aldyn ala. Aqparat jańara túsedi, degenimen bul sailaýda taǵy da barlyq partiialardyń belsendi emes ekenin baiqaimyz», - dedi ol.
Onyń pikirinshe, partiialar aýylǵa bet burýy tiis.
«Jalpy 4 jyldyń ishinde 2300 den astam aýyl ákimi sailanatynyn eskersek, partiialar jergilikti halyqpen jumys isteýdiń jaqsy múmkindigi týyndap otyr. Basqasha aitqanda partiialar aýylǵa bet burýy tiis. Eger úmitker partiia atynan sailansa, ol aýyldaǵy nemese kenttegi partiianyń betke ustar tulǵasyna ainalady. Turǵyndar ákimniń jumysyn partiianyń bedelimen bailanystyratyny sózsiz. Kelesi parlament sailaýynda sailaýshy partiiaǵa osy ákimderdiń jumysy arqyly baǵa beredi. Osyndai jaýapkershilikti sezine otyryp «NurOtan» partiiasynan basqalary bul sailaýǵa belsendi qatysýdan sheginshektep tur. Tsifrlar osylai sóileidi. Ókinishti árine.
«NurOtan» saiasi tehnologtary eldegi jalǵyz jaýapty partiiamyz dep taǵy jariia salatyn boldy. Jetekshi partiia úmitkerler usyný boiynsha sailaý okrýgteriniń 80% astamyn qamtyp otyr. Jetekshi partiianyń ambitsiiasy kúshti. Baýyrjan Baibek óz postynda «Partiia bul sailaýǵa barynsha daiyn. Qoǵamdyq saiasat institýty júrgizgen zertteýlerdi, partiianyń qoǵamdyq qabyldaý bólmeleriniń derekterin taldaýdy jáne jergilikti jerlerdegi qoǵamdyq-saiasi ahýaldy monitoringteý nátijelerin eskere otyryp, biz sailaý okrýgteriniń 80%-yn jeńýdi kózdep otyrmyz», - dep atap ótti. Partiia usynǵan 586 úmitkerdiń áleýmetik beinesine úńiletin bolsaq, onyń 36 %-nan astamy jańa tulǵalar. Úmitkerlerdiń ortasha jasy - 46 jas. Áielder ókilderi – 11%, 35 jasqa deiingi jastar – 14%.
Partiia óz kandidattaryn usyna otyryp, birinshi býyn ákimderdiń el Prezidenti usynǵan «Halyq únine qulaq asatyn memleket» tujyrymdamasy aiasynda halyqpen ózara árekettestiginiń jańa mádenietin qalyptastyra otyryp, zamanaýi tásilderdi endirýde. «NurOtan» óz tóraǵasy N.Nazarbaevtyń «Senim. Dialog. Bolashaqqa nyq qadam» atty partiiany júieli qaita jandandyrý baǵdarlamasy aiasynda aimaqtyq partiia apparatty jańartyp, jańa úmitkerlerge de arqa súiep otyr. Partiia ókilderiniń aitýy boiynsha, partiianyń maqsaty jeńis qana emes, eń bastysy aýyldardyń damýyna júieli jaǵdai jasaý.
Aldaǵy on kúndikte aýyl, kent, aýdandyq mańyzdaǵy qala ákimderine úmitkerlerdiń nasihat jumysyn baiqaityn bolamyz. Bul jalpy úmitkerlerge ǵana emes, partiialarǵa da, jalpy qoǵam úshin de jańa saiasi tájiribe bolmaq. Úmitkerlerge sailaýǵa deiin de, sailanyp ákim bolǵannan keiin de ter tógip jumys isteý kerek. Aýyl turǵyndarynyń saiasi mádenieti qazir ósip keledi. Olardy qur sózben aldai almaisyń. Olarǵa naqty istiń adamy qajet. Aýylda kóp turǵyn turmaitynyn eskersek, sailaý nátijelerin de tekserý de qiyn emes. Aýyl ákimin aýyl jinalysyna salyp qajet bolsa silkilep alýlary da múmkin.
Bul sailaý halyqtyń belsendiligin oiatyp bilikti memleket emes ózderi qalyptastyratyna senim beredi. Árine bul sailaýda aitys-tartys bolýy múmkin. Kóńili tolmaityndar da bolady. Bul zańdylyq. Eń bastysy úmitkerler sailaý naýqanynda usynatyn baǵdarlamalar, ýádelerdi erteń oryndai alatyna eń aldymen ózderi senimdi bolýy qajet. 4 jyl degen kóp ýaqyt emes. Barlyǵy halyqtyń kóz aldynda. Sondyqtan sailaýǵa túsetin úmitkerler jaýapkershilik pen salmaqty sezinedi dep oilaimyz» - dep jazdy ol áleýmettik jelidegi paraqshasynda.
