Parlament Májilisiniń jalpy otyrysynda depýtat Nurlybek Ojaev aýyldy jerlerdi qoldaýǵa qatysty usynystar aitty, dep habarlaidy QazAqparat.
«Búginde elimizdegi jalpy turǵyndardyń 41 paiyzy nemese 7 mln halqy aýyldyq jerlerde turady. Aýyl - memlekettiń azyq-túlik qaýipsizdiginiń kepili, AÓK salasynda innovatsiialardy iske asyrý jáne investitsiialardy tartý ortalyǵy. Elbasy 2019 jyly bastamashy bolǵan jobanyń maqsaty aýyldaǵy turmys jaǵdaiyn jaqsartý bolatyn. «Nur Otan» partiiasynyń 2025 jylǵa deiingi «Ózgerister joly: Ár azamatqa laiyqty ómir!» atty sailaýaldy baǵdarlamasymen osy joba aiasynda 3500 aýyldy jańǵyrtý qarastyrylǵan. Osy mindetti iske asyrý - aýyldyq jerlerdi keshendi damytýǵa jaǵdai jasaidy jáne aýyldyq eldi mekenderdiń kópshiligin óńirlik standarttarǵa jaqyndatýǵa múmkindik beredi. Bul týraly el Prezidenti Qasym-Jomart Toqaev biylǵy 1 qyrkúiektegi Joldaýynda atap ótti. Óńirlik standarttarǵa sáikestendirý aýyz sýmen qamtamasyz etýdi, joǵary jyldamdyqty internetke qoljetimdilikti, turǵyn úi qurylysyn, jergilikti mańyzy bar sapaly joldardy, jaramdy injenerlik jelilerdi qamtamasyz etýdi bildiredi», - dedi Ojaev QR Premer-Ministrdiń birinshi orynbasary Álihan Smaiylovtyń atyna joldaǵan saýalynda.
Depýtattyń paiymynsha, munyń bári, sapaly josparlaý jáne júieli qarjylandyrý jaǵdaiynda múmkin.
«Al, is júzinde neni kórip otyrmyz? Jalpy, «Aýyl - El besigi» jobasyn josparlaý kezinde 2021 jyly 480 aýyldy jańǵyrtýǵa 135 mlrd teńge bólinip, 1 140 jobany iske asyrý kózdelgen bolatyn. Alaida, 135 mlrd teńgeniń tek 106-sy ǵana bólindi, bul kózdelgen qarajattyń 78%-yn quraidy. Bul jaǵdaida oryndalmaǵan mindettemelerdi 2022 jyly aiaqtaýǵa da bolar edi, biraq 2022 jylǵa arnalǵan biýdjet jobasynda qaralǵan josparly soma 570 aýyl úshin 130 mlrd ornyna tek 62 mlrd teńge ǵana qarjy kózdelýde, bul josparlanǵannan eki ese az. Mundai resýrstarmen 2021 jylǵy tapshylyqty óteý túgili, tipti 2022 jyldyń mindetterin jartylai oryndaý da múmkin bolmaidy», - dedi ol.
Joǵaryda atalǵandardy eskere otyryp, «Nur Otan» partiiasynyń fraktsiiasy shuǵyl túrde:
- laýazymdy tulǵalardyń derbes jaýapkershiligin bekite otyryp, partiia baǵdarlamasyndaǵy maqsattardy biýdjet jaǵynan qamtamasyz etýdegi olqylyqtardy joiý jáne aýyldyq óńirlerdi qoldaý jónindegi keshendi jospar ázirleýdi;
- biýdjetti naqtylaý kezinde, merziminde jáne múltiksiz qamtamasyz etý maqsatynda «Nur Otan» partiiasynyń Jol kartasyn qarjylandyrýdyń nysanaly kórsetkishterin eskere otyryp, taiaýdaǵy 3 jylǵa arnalǵan jobalar pýlyn usynýdy;
- bolashaqta jobalaý-smetalyq qujattamany josparlaý jáne ázirleý úshin qarjylandyrýdyń boljamdy limitterin óńirlerge aldyn ala jetkizýdi;
- óz kezeginde, jergilikti ákimdikter, oblystyq jol kartalary men aýmaqtardy damytý baǵdarlamalaryna sáikes, biýdjettik ótinimderdi ázirleý jumystaryn kúsheitýdi talap etedi.
