QR Indýstriia jáne infraqurylymdyq damý ministri Jeńis Qasymbek «Nurly jer» baǵdarlamasyndaǵy kópbalaly otbasylarǵa beriletin jaldamaly baspanany arttyrýdy usyndy, dep habarlaidy QazAqparat tilshisi.
Úkimet úiinde ótken baspasóz máslihatynda ministr Astanada bolǵan qaiǵyly oqiǵa týraly pikir bildirdi.
«Bul óte qaiǵyly oqiǵa jáne úlken másele. Búgin Erbolat Dosaev myrzamen (QR Premer-Ministriniń orynbasary - red.) atalǵan máselege qatysty úlken jinalys ótedi. Biz osyndai otbasylarǵa (kópbalaly - red.) qosymsha páterler salý úshin qarajat izdep jatyrmyz. «Nurly jer» boiynsha jylyna 700 arendalyq páter kópbalaly otbasylarǵa beriletin bolsa, olardyń sanyn 2-3 esege kóbeitý kerek... «Nurly jer» baǵdarlamasyna kópbalaly januialar úshin arnaiy bólim qosýdy usynyp otyrmyz», - dedi Jeńis Qasymbek Úkimet úiinde jýrnalisterge bergen suhbatynda.
Onyń aitýynsha, Qazaqstanda 28 myń kópbalaly januia jergilikti organdarda arendalyq baspana kezeginde tur. Jaldaý quny baspananyń ár sharshy metrine 100 teńgeni quraidy.
«Iaǵni, eki bólmeli páterdiń ortasha jaldaý quny 8-10 myń teńge ǵana. Bul áleýmettik az qamtylǵan jandar úshin yńǵaily baǵa. Ótken jyldary kópbalaly jandarǵa 500-700 páter beriletin. Endi Elbasy tapsyrmasymen arendalyq baspanany qarjylandyrýdy 35 mlrd teńgege deiin ulǵaittyq. Endi 4 myń páter salýdy josparlap otyrmyz. Biraq, bul kezekte múgedekter, jetim balalar, aýǵan soǵysynyń ardagerleri bar - sanattar óte kóp», - dep túsindirdi ministr.
