«Nurly kósh» baǵdarlamasy boiynsha boi kótergen úiler sapasyz bolyp shyqty, - dep habarlaidy Habar arnasy.
Ókinishke orai barmaq basty, kóz qysty áreketter qai-qai salada da kezdesip jatady. Kesiri jumys nátijesine tiedi.
Óskemende «Nurly kósh» baǵdarlamasy boiynsha boi kótergen úiler sapasyz bolyp shyqty. 2009-2011 jyldary salynǵan baspanalardyń elektr jelilerin tartý kezinde óreskel qatelikterge jol berilgen.
Saldarynan «Shyǵys» aýylynda 5 úi órtenip ketti. Osyǵan bailanysty qala ákimdiginde arnaiy komissiia qurylyp, baspanalardyń sapasyn tekserýge kiristi.
Qairol Óserhannyń baspanasy bas-aiaǵy 15 minýtta kúlge ainalǵan. Birde-bir dúnie múlki qalmaǵan.
Tek órttiń arasynan qujattaryn alyp úlgergen. Eki apta buryn bolǵan bul tilsiz jaýdyń sebebin qazir quzyrly organdar tekserip jatyr.
Jalpy «Shyǵys» aýyly salynǵan 5 jylda 5 baspana órtendi. Turǵyndardyń aitýynsha, elektr jelileri talapqa sáikes tartylmaǵan. Árbir úidiń shatyrynda shubatylǵan symnan aiaq alyp júrgisiz. Elektr symdary tike jalǵanyp, úidiń tóbesine tóselgen penoplast pen ár jerden qoiylǵan taqtaidyń ústinde ashyq jatyr.
Bir qyzyǵy, bul baspanalar salynyp bolǵan soń memlekettik qabyldaý komissiiasyna tótenshe jaǵdailar qyzmetkerleri qatystyrylmapty.
Raýan Qasaiynov, qalalyq TJ basqarmasynyń bólim basshysy:
- Tikelei Óskemen qalasynyń tótenshe jaǵdailar qyzmeti arnaiy komissiianyń quramyna qatysqan joq. Biz úilerdi qabyldap alǵan joqpyz.
Oljas Kereihan, tilshi:
- Jalpy «Shyǵys» aýylynda 611 úi bolsa, onyń teń jartysy mynadai penoplastan nemese jazǵy baspanalarǵa arnalǵan qurylys materialdarynan salynǵan. Al elektr jelileri 380 Volttyq qýat kózine qosylǵan. Sondyqtan órt qaýipsizdigi kóp úrei týǵyzady.
Arnaiy qurylǵan komissiia árbir úidi aralap, tek órt qaýipsizdigi emes, jalpy qurylysty salý kezinde ketken kemshilikterdi tizip júr.
Erjan Qońyrbaev, qala ákiminiń orynbasary:
- Myna tekserilgen úiler. Zerthana jaldap, onyń bárin jasaǵanbyz. Shynynda da elektr toǵy jaǵynan qatelik bolǵan. Asa qaýipti jaǵdaiy bolyp jatsa, ony qolma-qol isteimiz.
Eki-úsh jyl buryn úileri órtenip ketken otbasylar óz qarjylaryna ózderi baspana salyp alǵan. Al Qairol Óserhanǵa osy aýyldan memleket esebinen basqa úi berildi.
Qairol Óserhan, Shyǵys aýylynyń turǵyny:
- Qazir jylý tartyp, ishin jóndep, osy úige kirip, ornalasyp jatyrmyz. Áiel, bala-shaǵammen. Bári jaqsy bolyp tur. «Nurly kósh» baǵdarlamasy boiynsha bul aýyldy salýǵa memleketten 4 milliard teńgeden astam qarjy bólingen. Qurylysty sapasyz júrgizgen merdiger mekemelerdiń ókilderi keiin sot aldynda jaýap berdi.
Tek sol kezde ketken kemshilikterdi turǵyndar áli túzetýmen álek.
