Qasym-Jomart Toqaevtyń prezidenttiginiń jeti jyly jekelegen sheshimderdi ǵana emes, el damýynyń negizgi baǵytyn baǵalaýǵa múmkindik beredi. Munai-gaz salasynyń sarapshysy ári Energy Monitor qoǵamdyq qorynyń direktory Nurlan Jumaǵulov Qazaqstan ekonomikasyndaǵy tereń ózgeristerge taldaý jasady. Onyń pikirinshe, reformalardyń eń belsendi kezeńi 2022 jyldan keiin bastaldy, ol kezde memleket úlesin azaitý, básekelestikti damytý, jeke biznesti qoldaý jáne ártúrlendirý memlekettik basymdyqtarǵa ainaldy.
Sarapshy JÓÓ kólemin ǵana emes, ishki sapalyq ózgeristerdi taldaýdyń mańyzdylyǵyn atap ótedi. 2019 jyldan 2025 jylǵa deiin eldiń nominaldy JÓÓ $181,7 mlrd-tan $306 mlrd-qa deiin ósti, bul rette 2025 jyly ekonomikanyń naqty ósimi 6,5% qurady. Negizgi úlesti ónerkásip, saýda, kólik jáne qurylys salalary qosty.
Dúniejúzilik banktiń málimetinshe, óńdeý ónerkásibiniń JÓÓ-degi úlesi 2019 jylǵy 11,5%-dan 2025 jyly 12,7%-ǵa deiin artty. Shikizattyq emes sektordyń oń dinamikasy ekonomika qurylymynyń birtindep túrlenýin kórsetedi, hosh shikizatqa táýeldilik máselesi áli de ózektiligin saqtap otyr.
Qarjy salasynda depozitik bazanyń nyǵaiýy, sondai-aq áleýmettik infraqurylymda aitarlyqtai ilgerileý baiqalady. Ulttyq statistika biýrosynyń derekterine sáikes, halyqty turǵyn úimen qamtamasyz etý deńgeii jan basyna shaqqanda 22,2-den 25,1 sharshy metrge deiin artty, al 2025 jyly 20,3 mln sharshy metrden astam jyljymaityn múlik paidalanýǵa berildi. Qazaqstan sonymen qatar Dúniejúzilik ekonomikalyq forýmnyń Saiahat pen týrizmdi damytý indeksinde 66-orynnan 52-orynǵa kóterildi.
Nurlan Jumaǵulov ekonomikalyq qaita qurýlar memlekettik institýttardy reformalaýmen qatar júrip jatqanyna basa nazar aýdarady:
«Aldaǵy kezeńde basty mindet JÓÓ ósiminiń birneshe jylyn qamtamasyz etý ǵana emes, memlekettiń áleýmettik ornyqtylyǵyn saqtai otyryp, anaǵurlym básekege qabiletti ári tehnologiialyq ekonomika qurý bolyp tabylady».
Ortalyq Aziiadaǵy kórshiles memleketterdiń qarqyndy ósýin sarapshy Qazaqstan úshin saýdany, logistikany keńeitý jáne ortaq naryqty qalyptastyrý boiynsha qosymsha múmkindik retinde baǵalaidy.
Qazaqstanda damyǵan qarjylyq baza, infraqurylym jáne adami kapital qalyptasqan. Jumaǵulovtyń baǵalaýynsha, kelesi kezeńde el tabysynyń negizgi faktorlary shikizatty tereń óńdeý, qosylǵan quny joǵary ónim eksportyn arttyrý, tehnologiialyq damý jáne jeke sektordyń rólin nyǵaitý bolmaq.
