Májilis tóraǵasy Nurlan Nyǵmatýlinniń tóraǵalyǵymen Palatanyń jalpy otyrysy ótip, onda depýtattar saqtandyrý jáne baǵaly qaǵazdar naryǵyn retteý men damytý máselelerine qatysty zań jobasyn birinshi oqylymda maquldady, dep habarlaidy QazAqparat.
«Osy zań jobasyn talqylaý barysynda depýtattar jeńil jol-kólik oqiǵalary kezinde jáne zardap shekkender bolmaǵan jaǵdaida, avtokólik ieleriniń ózara kelisimi boiynsha politsiia shaqyrýsyz jáne sot sheshiminsiz hattama resimdep, iaǵni saqtandyrý tólemin jedeldetilgen jáne ońailatylǵan túrde alý týraly usynystaryn jetkizdi», - delingen Májilis baspasóz qyzmetiniń málimetinde.
Májilis tóraǵasy Nurlan Nyǵmatýlin depýtattardyń usynysyn qoldai otyryp, osy zań jobasy joǵaryda aitylǵandai saqtandyrý tóleminiń jeńildetilgen syzbasyn qoldana alatynyn atap ótti. Iaǵni, politsiia hattamasyn resimdemei jáne ákimshilik sottyń sheshiminsiz.
Sonymen qatar, otyrysta depýtattar azamattardyń qor naryǵyna qatysý aiasyn keńeitý qajettigi týraly máselesin kóterdi.
Nurlan Nyǵmatýlin jeke investorlardyń quqyqtaryn qorǵaý sharalaryn kúsheitý, ol birinshi kezekte bizdiń otandyq qor naryǵymyzdy damytý úshin qajet ekenin aitty.
2012 jyly Elbasy azamattarymyzdyń IPO arqyly jekeshelendirý protsesterine qatysý mindetin qoiǵanyna nazar aýdarǵan Palata tóraǵasy «QazTransOil», «Kegok» jáne «Kcell» aktsiialary iske asyrylǵanyn, biraq bul protseske, onyń ishinde jekeshelendirý protsesterine halyqtyń qatysýynyń ashyq jáne qaýipsiz tetigi bolmaǵandyqtan, jeke investor naryqqa kelmegenin alǵa tartty.
Sondai-aq, Májilis tóraǵasy biylǵy jyly Memleket basshysy Reformalar jónindegi joǵary keńes týraly otyrysynda árbir azamattyń ulttyq bailyqtyń bir bóligin alý múmkindigi bolýy úshin aktsiialardy birinshi kezekte jeke tulǵalarǵa – Qazaqstan azamattaryna ótkize otyryp, «Halyqtyq IPO» baǵdarlamasyn qaita bastaý mindetin qoiǵanyn atap ótti.
Nurlan Nyǵmatýlinniń aitýynsha, bul Qazaqstannyń qor naryǵynyń ósýi aiasynda óte ózekti.
Agenttiktiń málimetinshe, onyń kólemi sońǵy 5 jylda 3 eseden astamǵa ósip, 47 trillion teńgege nemese JIÓ-niń 67%-yna jetti.
«Qor naryǵy, shyn máninde, qazirgi kezdegidei kapitaldy qaita bólý orny ǵana emes, halyqtyń qosymsha tabys kózderiniń biri bolýy kerek», - dedi Palata spikeri.
Mysaly, kórshi Reseide, bólshek investorlardyń úlesi 10% nemese 15 million adamdy quraidy.
Jalpy zań jobasy ómirdi saqtandyrýdyń jańa áleýmettik mańyzdy ónimderin endirý jolymen saqtandyrý naryǵyn jáne baǵaly qaǵazdar naryǵyn odan ári damytý, saqtandyrý qyzmetterin tutynýshylardyń jáne qor naryǵynda investorlardyń quqyqtaryn qorǵaý sharalaryn kúsheitý, saqtandyrýdyń kepildik beriletin synyptarynyń tizbesin keńeitý, saqtandyrý naryǵy men baǵaly qaǵazdar naryǵynyń kórsetiletin qyzmetterin tsifrlandyrý úshin quqyqtyq jaǵdailar jasaý maqsatynda ázirlengen.
